Amérika xitay bankilirining rusiyege yardem qilishigha qarshi tedbir almaqchi bolghan

Washin'gtondin muxbirimiz jewlan teyyarlidi
2024.04.24

Amérika xitay hökümitining qosh menpe'etlik soda arqiliq rusiyening herbiy jehettin küchlinishige yardem qilishigha qarshi turmaqchi bolghan, buningdiki asasliq nishan xitay bankiliri iken.

“Wal-sitrét zhurnili” ning 24-aprél bergen xewiride déyilishiche, amérika tashqi ishlar ministiri antoni bilinkén xitaygha ziyaretke bérishtin awwal bildürgen ipadiside, xitay bankilirining qosh menpe'etlik sodidin paydilinip, rusiyening urush jinayitige arqa septin yardem qilishigha emdi qarap turghili bolmaydighanliqini éytqan. Bilinkén 19-aprél küni qilghan sözide, xitayning rusiyening dölet mudapi'e sana'itige yardem qiliwatqanliqini tenqidlep: “Xitay rusiyege hel qilghuch qorallarning zapchaslirini teminlesh arqiliq, rusiyening ukra'ina urushida ghelibe qilishigha yardem qiliwatqan asasliq küchke aylanmaqta” dégen.

Melum bolghinidek, rusiye 2022-yil 2-ayda ukra'inagha tajawuz qilghandin kéyin, amérika we yawropa döletliri rusiyening pul-mu'amile sistémisigha omumyüzlük jaza cheklimisi qoyghanidi. Shuningdin kéyin xitay bilen rusiye dollar arqiliq emes, xitay puli bilen soda qilip kelgen. Bu arqiliq ular amérikaning jaza cheklimisidin qutulmaqchi bolghan. Halbuki, dunyadiki nurghun döletler tashqi sodida dollargha tayinidighan bolup, xitayning dollarning küchige taqabil turushi qiyin bolup kelgen.

Xewerde éytilishiche, yéqinqi bir qanche heptide amérika emeldarliri xitaygha bolghan bésimni kücheytiwatqan bolup, amérika hökümitining xitayning pul-mu'amile organlirigha her waqit küchlük heriket qollinidighanliqini, chünki bu organlarning rusiye bilen bolghan qosh menpe'etlik sodini, yeni xelqqe kéreklik buyumlar we herbiy eshyalar sodisini ilgiri sürüshte hel qilghuch rol oynawatqanliqini ilgiri sürgen. Eger amérika diplomatiye yoli bilen xitayni rusiyege mal éksport qilishtin yanduralmisa, xitay bankilirigha jaza cheklimisi qoyush arqiliq xitaygha bolghan bésimni yuqiri pellige kötüridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.