Америка-хитай мунасивәтлиридики җиддийлик америка ширкәтлириниң хитайдин мал импорт қилишиға тәсир қилған

Вашингтондин мухбиримиз әркин тәйярлиди
2023.08.07

 Америка-хитай мунасивәтлиридики җиддийлик америка ширкәтлириниң хитайдин мал импорт қилиш миқдарини азайтишиға сәвәб болған. “вашингтон почтиси” гезитиниң 6-авғуст хәвәр қилишичә, бу йил 5-айғичә хитайдин товар импорт қилиш миқдари 24 пирсәнт азийип, мексика америкиниң әң чоң сода шерикигә айланған. Нөвәттә америка билән хитай кәскинлишип кәткән икки тәрәп мунасивитини юмшитишқа киришкән болсиму, лекин америка ширкәтлири йәнила тәминләш зәнҗиридә хитай тәвәсидики мәнбәләргә тайинишни азайтишқа тиришмақта икән. “вашингтон почтиси” ниң америка истатистика идарисидин нәқил кәлтүрүп бәргән хәвиридә, бу йилниң дәсләпки бәш ейида американиң хитайдин импорт қилған мәһсулатлириниң миқдари өткән йилниң охшаш мәзгилидикидин 24 пирсәнт азайған.

 Мәлум болушичә, нөвәттә HP, лего (Lego)  қатарлиқ ширкәтләр хитайға тайинишни азайтип өзиниң тәминләш зәнҗиридики орнини қайта тәртипкә селишқа,  шу арқилиқ рәқиб дөләтләрниң арисида тоқунушуп қелиштин сақлинишқа тиришмақта икән. Хәвәрдә  һәр икки әһвалда хитайниң дуня сода тәшкилатиға әза болған 20 нәччә йилдин бери дуняниң ишләпчиқириш мәркизигә айлиништәк орни җиддий хирисқа дуч келидиғанлиқи, мексика, вийетнам, тайланд қатарлиқ дөләтләрниң көлими вә ул әслиһәлири хитайға йәтмисиму, лекин униң бу җәһәттики һөкүмранлиқ орнини тартивелиши мумкинлики тәкитләнгән.

 Мәлум болушичә, бу йилниң башлирида мексика американиң әң чоң сода шерикигә айланған. 2018-Йили сода уруши башланғандин бери мексика, канада вә хитай нөвәт билән американиң әң шериклик орнини игиләп кәлмәктә икән. Хәвәрдә йәнә америка ширкәтлириниң тәминләш зәнҗирини көп хиллаштурушта вийетнам билән тайланд уларниң алдин ойлишидиған дөләтлири икәнликини, шундақла һиндистанму алма ширкитигә охшаш карханиларниң диққитини қозғиғанлиқи, униң һиндистанда әқлий янфон ишләпчиқиришни  күчәйтишни пиланлаватқанлиқи  билдүрүлгән. Мәлум болушичә, хитайниң өткән йили америкаға шәхси компютер импорт қилиши 2016-йилдики 65 пирсәнттин  45 пирсәнткә чүшкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.