Америка-хитай арисидики җиддийчиликни пәсәйтиш үчүн билинкен хитайға зиярәткә баридикән

Вашингтондин мухбиримиз уйғар тәйярлиди
2024.04.22

Америка ташқи ишлар министири антоний билинкен америка-хитай арисидики җиддий вәзийитини пәсәйтиш, район вә дунявий характерлик мәсилиләрни музакирә қилиш үчүн хитайни зиярәт қилидикән.

Америка ташқи ишлар министирлиқиниң баянатиға асасланғанда, америка ташқи ишлар министири антоний билинкен 24-апрелдин 26-апрелғичә хитайни зиярәт қилидикән. У шаңхәй вә бейҗиңда хитайниң юқири дәриҗилик әмәлдарлири билән көрүшүп, оттура шәрқ киризиси, русийәниң украинаға қозғиған таҗавузчилиқ уруши, тәйвән мәсилиси вә җәнубий деңиз қатарлиқ бир қатар район һәм дуняви мәсилиләрни музакирә қилидикән

Баянатта мундақ дейилгән: “америка ташқи ишлар министири антоний билинкен, хитайниң юқири дәриҗилик әмәлдарлири билән көрүшүп, америка-хитай оттурисидики район һәм дуняви мәсилиләрни музакирә қилиду. Шуниң билән бир вақитта, пирезидент байден билән ши җинпиңниң өткән йили ноябирда өткүзүлгән икки дөләт башлиқлар йиғинида зәһәрлик чекимликкә қарши туруш, һәрбий алақә, сүний әқил вә икки дөләт хәлқлири арисидики алақини күчәйтиш бойичә бәргән вәдиләрни әмәлгә ашуруш үчүн елип бериливатқан хизмәтләрни музакирә қилиду” .

Америка сода хәвәр қанили (CNBC) ниң хәвиригә асасланғанда, бу билинкенниң өткән йили 6-айда америка-хитай оттурисидики җиддий вәзийәтни пәсәйтиш үчүн елип барған дипломатик зияритидин кейин, хитайға қилған иккинчи қетимлиқ зиярити һесаблинидикән. У бу қетим хитай ташқи ишлар министири ваң йи қатарлиқ хитайниң юқири дәриҗилик әмәлдарлири билән көрүшидикән. Билинкенниң бу қетим хитай компартийәсиниң баш секретари ши җинпиң билән көрүшидиған яки көрүшмәйдиғанлиқи һазирчә ениқ әмәс икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.