Amérika-xitay arisidiki jiddiychilikni peseytish üchün bilinkén xitaygha ziyaretke baridiken

Amérika tashqi ishlar ministiri antoniy bilinkén amérika-xitay arisidiki jiddiy weziyitini peseytish, rayon we dunyawiy xaraktérlik mesililerni muzakire qilish üchün xitayni ziyaret qilidiken.

Amérika tashqi ishlar ministirliqining bayanatigha asaslan'ghanda, amérika tashqi ishlar ministiri antoniy bilinkén 24-apréldin 26-aprélghiche xitayni ziyaret qilidiken. U shangxey we béyjingda xitayning yuqiri derijilik emeldarliri bilen körüshüp, ottura sherq kirizisi, rusiyening ukra'inagha qozghighan tajawuzchiliq urushi, teywen mesilisi we jenubiy déngiz qatarliq bir qatar rayon hem dunyawi mesililerni muzakire qilidiken

Bayanatta mundaq déyilgen: “Amérika tashqi ishlar ministiri antoniy bilinkén, xitayning yuqiri derijilik emeldarliri bilen körüshüp, amérika-xitay otturisidiki rayon hem dunyawi mesililerni muzakire qilidu. Shuning bilen bir waqitta, pirézidént baydén bilen shi jinpingning ötken yili noyabirda ötküzülgen ikki dölet bashliqlar yighinida zeherlik chékimlikke qarshi turush, herbiy alaqe, sün'iy eqil we ikki dölet xelqliri arisidiki alaqini kücheytish boyiche bergen wedilerni emelge ashurush üchün élip bériliwatqan xizmetlerni muzakire qilidu” .

Amérika soda xewer qanili (CNBC) ning xewirige asaslan'ghanda, bu bilinkénning ötken yili 6-ayda amérika-xitay otturisidiki jiddiy weziyetni peseytish üchün élip barghan diplomatik ziyaritidin kéyin, xitaygha qilghan ikkinchi qétimliq ziyariti hésablinidiken. U bu qétim xitay tashqi ishlar ministiri wang yi qatarliq xitayning yuqiri derijilik emeldarliri bilen körüshidiken. Bilinkénning bu qétim xitay kompartiyesining bash sékrétari shi jinping bilen körüshidighan yaki körüshmeydighanliqi hazirche éniq emes iken.