Америка малийә министири хитайни пул курсини сүний товән тутушниң ақивити һәққидә агаһландурған

Мухбиримиз җүмә
2016-06-19
Share


Америка малийә министири пәйшәнбә күни хитайни хәлқ пулиниң алмаштуруш қиммитини сүний товән тутушниң ақивити һәққидә агаһландурған.

Ройтерсниң нәқил қилишичә, америка кархана тәтқиқат институтида нутуқ сөзлигән америка малийә министири җәк лев хәлқ пулиниң алмаш туруш қиммитини товән тутуш вә експортқа таянған иқтисадий игиликниң кона усул икәнликини әскәрткән һәмдә мундақ дегән: "нөвәттики аҗиз дуняви иқтисадий өсүш нуқтисидин ейтқанда, бу икки дөләт арисида йеңи бир қатар җиддийчиликкә сәвәб болиду."

Хитай һөкүмити 2015 - йили авғустта хәлқ пулиниң курсини йәнә чүшүргән вә пул курсини контрол қилишни күчәйткән иди.

"иқтисад вақит гезити" ниң көрситишичә, хитай хәлқ пули курсини турақлаштуруш, вә башқиларниң хитай иқтисадиға болған ишәнчни сақлаш үчүн өткән йили авғусттин бу йил мартқичә ташқи перевот записидин 473 милярд доллар сәрп қилған.

Хәвәрдә нәқил қилишичә, хитай мәркизий банкисидики бир хадим ишәнчиниң һәммә нәрисидин дерәк беридиғанлиқи, базарға арилишиш чиқимини пул билән өлчигини болмайдиғанлиқи, әгәр хитай иқтисадиға қаритилған ишәнч йоқалса буни әслигә кәлтүрүшниң тәскә тохтайдиғанлиқни билдүргән.

Һалбуки, америка малийә министири лев хитайни йәнила хәлқ пулиниң курс мәсилисини базарға қоюп беришкә чақирған вә буниң хитай бу һәқтә бәргән вәдиләргә уйғун икәнликини билдүргән.

У ундақ дегән: "базарда пул курсини төвәнлитидиған бесим болса хитайниң униңға йол қоюши бир мәсилә, әмма хитайниң вәдисидә турған турмиғанлиқини көрситидиған һәқиқий испат болса, базарда пул курсини өстүридиған долқун шәкилләнгәндә хитайниң униғиму йол қоюшида."

Йиллардин бери хитай пулиниң долларға болған алмаштуруш қиммити мәсилиси америка - хитай мунасивәтлиридики назук темиларниң бири болуп кәлгән.

Америкиниң бир қисим дөләт мәҗлиси әзалири хитайниң хәлқ пулиниң алмаштуруш қиммитини қәстән товән тутуш арқилиқ, өз мәһсулатлириниң америка базирида үстүнлүк қазинишиға йол ачқанлиқини көрсәткән. Улар буниң америка ширкәтлирини зиянға учритиватқанлиқи билдүрүп америка һөкүмитидин җиддий тәдбир қоллинишини тәләп қилип кәлгән иди.

Мәлум болушичә, өткән һәптә бейҗиңда өткүзүлгән бир йиғинда хитай тәрәп хәлқ пулиниң қиммитини базарниң тәңшишигә қоюп беришкә қарап тәдриҗий илгириләйдиғанлиқи вә бу һәқтики сиясәтлирини тәңшәйдиғанлиқи һәққидә вәдә бәргән.

Хитай - америка иқтисадий мунасивәтлириниң узун йолларни бесип өткәнликини билдүргән лев йәнә хитай бәргән вәдиләрниң пәқәт гәп пети қелип қалмай әмәлийәттә көрситилишини тәләп қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт