Америкадики иштатлар хитай пуқралири вә ширкәтлириниң йәр-земин сетивелишини арқа-арқидин чәклимәктә

Вашингтондин мухбиримиз әркин тәйярлиди
2024.04.05

Америкадики һәр қайси иштатлар, болупму җумһурийәтчиләр контроллуқидики иштатлар арқа-арқидин қанун чиқирип, хитай пуқралири вә ширкәтлириниң йәр земин сетивелишини чәкләшни күчәйтмәктикән. “политико” йәни “сиясәт” гезитиниң хәвәр қилишичә, американиң һәр қайси иштатлиридики қанун чиқарғучилар америка дөләт бихәтәрлики дуч келиватқан ениқ вә үзлүксиз тәһдиткә қарши бир қатар қанунларни чиқарған яки чиқиришни ойлишиватқан болуп, улар бу арқилиқ хитай пуқралири вә ширкәтлириниң йәр-земин сетивелишини чәклимәкчи икән. “политико” ниң 3-апрел бәргән хәвиридә, һазир америкадики 3 дин икки қисимдин артуқ иштатниң, болупму җумһурийәтчиләр контроллуқидики иштатларниң чәт әлликләрниң йәр-земин сетивелишини чәкләш яки чәклимә қоюш һәққидә қанун чиқарғанлиқи вә чиқиришни ойлишиватқанлиқи билдүрүлгән.

Хәвәрдә қәйт қилинишичә, бу қанунлар америкаға дүшмән дөләтләрниң йәр земин сетивелишини чәклигәндәк қилсиму, әмма бу қанунларниң хитайни асаси нишан қилғанлиқида гуман йоқ икән. Хәвәрләрдә, бу хил қанунларниң тексас, филорида қатарлиқ иштатларда йолға қоюлуп болғанлиқи, җәнубий дакота иштатиниң валийси кристи ноемниң йеқинда җәнубий дакота иштатлиқ авам палатасида қилған сөзидә, хитайни “дүшмән”, дәп тәриплигәнлики қәйт қилинмақта. Мәлум болушичә, кристи ноем өткән айда хитай вә башқа 5 дөләтниң җәнубий дакота иштатидин йәр-земин сетивелишини чәкләйдиған бир қанунға имзаға қойған. Хәвәрләрдә, һәр қайси иштатлардики әндишиниң 2023-йили 2-айда, америка һава бошлуқиға үссүп киргән хитай һава шариниң етип чүшүрүлүшидин кейин техиму артқанлиқи, америка истихбарат әмәлдарлириниң хитайниң америкадики тәсир күчи һәққидә үзлүксиз агаһландуруватқанлиқи билдүрүлгән. “политико” ниң қәйт қилишичә, нөвәттә америкадики 20 дин артуқ иштат чәт әлниң йәр сетивелишини чәкләш һәққидә йеңи қанун чиқириш яки бурун бар болған қанунға түзитиш киргүзүш басқучида болуп, 2023-йили аз дегәндә 15 иштат қанун чиқирип, чәт әлниң йәр земин сетивелишини чәклигән яки чәклимә қойғаникән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.