Америка русийәниң украина урушиға ярдәм қилған хитай ширкәтлирини җазалашни ойлашмақта

Америка русийәниң украина урушиға ярдәм бәрмәктә, дәп қариливатқан хитай ширкәтлиригә қарита ембарго йүргүзүшни ойлашмақтикән. Әгәр америка һөкүмити бу хитай ширкәтлиригә қарита җазалаш елип барса, бу, американиң украина уруши партлиған икки йилдин бери тунҗи қетим хитайни бу урушта биваситә җавабкарлиққа тартиши болуп қалиду. Америка CNBC телевизийә қанилиниң хәвәр қилишичә, америка дөләт мәҗлиси әзалири русийәниң украинаға қарши урушиға ярдәм қилған хитай ширкәтлирини җазалашни ойлишиватқанлиқини ейтқан. Америка авам палата әзаси гералд конолли ( Gerald Connolly) явропа иттипақиниңму  өткән һәптә бу хил пиланни оттуриға қойғанлиқи, америка авам палата әзалириниңму бу хил пиланни ойлашқанлиқини ейтқан.

Германийәдики мюнхен хәвпсизлик  йиғиниға қатнашқан гералд конолли 18-феврал күни CNBC ға қилған сөзидә: “хитай шуни билиши керәк, охшаш ембарго хитайғиму йүргүзүлиду. Бу җаза русийәгә һәқиқий үнүмини көрситишкә башлиди. Бу, русийәниң ишләпчиқириш күчи, иқтисадий ипадиси вә турмуш сапасиға тәсир қилмақта” дегән. Гералд коноллиниң агаһландурушичә,  әгәр хитайға ембарго йүргүзүлсә, “униң тартидиған зийини русийәдин җиқ көп болидикән”.

Гералд конолли бу сөзләрни йеқинда “дипломат” журнилидики бир доклатта, оттура асия җумһурийәтлириниң, болупму өзбекистан билән қирғизистанниң русийәгә көпләп машинисазлиқ әсваблирини експорт қиливатқанлиқи, бу машинисазлиқ әсваблириниң уйғур дияридин импорт қилиниватқанлиқи оттуриға қоюлған бир вақитта ейтқан. Американиң ембаргоси иқтисадий турғунлуқ вә киризистики хитай иқтисадиға қаттиқ зәрбә болидиғанлиқи қәйт қилинмақта. CNBC Ниң хәвиридә дейилишичә, гералд конолли, ембарго содида хитайға тайинидиған америкаға зиян салсиму, лекин буниң җазани тосуп қалалмайдиғанлиқи вә җазаниң наһайити тез арида йолға қоюлуши мумкинликини ейтқан. Гералд коноллиниң ейтишичә, әгәр хитайға ембарго йүргүзүлсә, униң, иқтисади аҗиз әһвалдики хитайға болған зәрбиси қаттиқ болидикән. Шуңа, “хитай русийәниң зораванлиқи вә пәскәшликини қоллашниң ақивитини әтраплиқ ойлишиши керәк” икән.