Donald tramp: "Xitay dawamliq amérikani qaqti-soqti qiliwatidu!"

Muxbirimiz eziz
2019-07-30
Élxet
Pikir
Share
Print

Amérika bilen xitayning demalliqqa toxtap qalghan soda söhbiti 30-iyul küni shangxeyde qaytidin bashlandi. Hazir gerche söhbetning qandaq netije bilen ayaghlishidighanliqi téxi namelum bolsimu, bu heqte xitay we amérika hökümetliri oxshash bolmighan derijide inkas qayturdi.

Xitay hökümitining kaniyi bolghan shinxu'a agéntliqi bu heqtiki xewerliride "Amérika wekilliri richard nikson ependining ziyaritidin ülge élishi lazim" déyish arqiliq 1972-yili amérika prézidénti richard niksonning shangxey shehirini ziyaret qilghandin kéyin xitay bilen hemkarliq munasiwiti ornitish kélishimlirige imza qoyghanliqini ishare qildi. Emma amérika prézidénti donald tramp shu küni twéttérgha yollighan uchurida "Xitay bizni dawamliq soqimen, dep xam xiyal qiliwatidu" dep yazdi. Shuningdek xitay terepning herqachan söhbetning axirqi basquchigha barghanda alaqidar kélishim mezmunini öz paydisigha boysundurup tengsheshke urunup kéliwatqanliqini keskin tenqidlidi hemde buninggha misal qatarida amérikaning yéza igilik mehsulatlirini sétiwélish sahesidiki qilmishlirini tilgha aldi.

Prézidént donald tramp özining tiwéttér uchurida xitay hökümitining 2020-yildiki prézidéntliq saylimining netijisini kütüp söhbetni qesten sozuwatqanliqini, nawada özi bu saylamda saylinalmay qalsa kéyinki nöwetlik "Yumshaqbash" amérika prézidéntini dawamliq koldurlitip, ötken ottuz yildikige oxshash amérikani dawamliq qaqti-soqti qilishning koyida boluwatqanliqini bildürüp؛ "Men saylamda yéngip chiqqandin kéyin xitayning duch kélidighini hazirqi soda söhbitide muzakire qiliniwatqandinmu éghirraq zerbe bolidu" dédi. U yene kelgüside bu xildiki soda söhbitini ötküzmeyla qoyush bilen birge téximu küchlük kozirlarni otturigha tashlaydighanliqini tekitlidi.

Melum bolushiche, bügünki soda söhbitige amérika maliye ministiri stiwén mnushin we xitayning mu'awin bash ministiri lyu xé biwasite ishtirak qilghan bolup, söhbetning netijisi mushu hepte éniq bolidiken.

Toluq bet