Amérika hökümiti yene bir türküm xitay mallirigha qoyulidighan bajni östürmekchi

“Amérika awazi” radiyosining bu heqtiki xewiridin qarighanda, amérika hökümet emeldarliri xitayning soda sahesidiki riqabette adil bolmasliqi we tijarette bazarni chiqish qilmasliqidek adetliridin izchil endishe qilip kelmekte. Buning üchün aldimizdiki bir qanche kün ichide amérika hökümiti yene bir türküm xitay mallirigha qoyulidighan bajni östürüp, yolgha qoyush pilanini élan qilishi mumkinken.

Baydin hökümiti 2024-yili 5-ayda xitaydin import qilinidighan mallargha qoyulidighan tamozhna béjini körünerlik östürgen. Buningda éléktir motorluq qatnash wasitilirige qoyulidighan baj nisbitining 100 pirsent östürülidighanliqi, yérim ötküzgüch we küntaxta mehsulatlirining tamozhna béjini 50 pirsentke, litiy iyonluq bataréye we polat qatarliq bashqa istratégiyelik mehsulatlarning béjini 25 pirsent östürgenlikini élan qilghan idi.

Xewerde déyilishiche, baydin hökümitining bu qarari tennerxning ösüp kétishidin ensirigen bir qisim amérika shirketlirini endishige salghan. Emma omumiy jehettin alghanda bu heriket amérikada ishlepchiqirishni eslige keltürüsh, teminlesh zenjirining sijilliqigha kapaletlik qilish we amérika sana'itini qoghdash sahesidiki tirishchanliq, dep bahalan'ghan.

Melum bolushiche, bu hepte xitayda resmiy ziyarette bolghan aqsarayning dölet bixeterlik meslihetchisi jéyk sulliwanmu xitay tashqi ishlar ministiri wang yi bilen uchrashqanda “Amérikaning dölet menpe'etini qoghdash üchün zörür tedbirlerni élishni dawamlashturidighanliqi” ni tekitligen iken.

Xitayning adil bolmighan soda aditi hazir bashqa döletlernimu mushundaq tedbirlerni élishqa mejburlimaqta. Téxi bir qanche kün awwal kanadamu 2024-yili 1-öktebirdin bashlap xitayning tokluq aptomobilliri importigha 100 pirsent, polat-tömür we alyumin importigha 25 pirsent tamozhna béji qoyidighanliqini jakarlighan idi.