Президент трамп 200 милярд долларлиқ хитай мәһсулатиға баҗ қоюшни тәләп қилған

Мухбиримиз әркин
2018-08-31
Share

Америка президенти доналд трамп келәр һәптә ичидә йәнә 200 милярд долларлиқ хитай експорт мәһсулатиға таможна беҗи қоюшни тәләп қилған. Америка "блумберг хәвәрлири" агентлиқиниң пәйшәнбә күни вәқәдин америка һөкүмәт әмәлдарлиридин нәқил кәлтүрүшичә, президент трамп ярдәмчилиригә таможна беҗи қоюшни 6‏-сентәбирдин кейин дәрһал йолға қоюшни тәкитлигән.

Президент трамп илгири мәзкур мәсилини бу йил 6‏-сентәбиргичә америка җамаәт пикириниң муназирә қилишиға сунған иди.

Америка фокус хәвәрлири телевизийә қанилиниң буниңдин сәл аввал бәргән хәвиридә, трамп һөкүмитиниң 5‏-сентәбирдин кейин хитайниң йемәк-ичмәк мәһсулатлиридин тартип аптомобил чақиғичә болған експорт мәһсулатлириға 25 пирсәнт баҗ қоюлуши мумкинликини билдүргән.

Ройтерсниң җүмә күни хәвиридә баян қилишичә, ақсарай президент трампниң пат арида хитай мәһсулатлириға йәнә баҗ қойидиғанлиқи һәққидики хәвәрләргә инкас қайтурушни рәт қилған. Һалбуки, учур мәнбәлири "блумберг хәвәрлири" гә бәргән учурида, буниңға техи ахирқи хуласә әмәслики, таможна беҗиниң қисимларға бөлүп иҗра қилиниши вә келәр һәптә елан қилинип, кейинки күнләрдә иҗра қилиниши мумкинликини билдүргән.

Хәвәрдә тәкитлишичә, йеңи таможна беҗиниң америка-хитай арисидики сода урушини техиму күчәйтидикән. 

Президент трамп илгири хитайниң базирини ечиветип, америкиниң содидики 375 милярд долларлиқ қизил рәқими азайтишини, хитай мәһсулатлириға қошумчә ярдәм беришни тохтитишни, вә америка карханилириниң әқлий мүлк һоқуқиға һөрмәт қилишни тәләп қилған. У йеқинда ройтерс агентлиқиниң зияритини қобул қилип, "хитай билән болған сода ихтилапини һәл қилишқа вақит кетидиғанлиқи" ни билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт