Xitayning amérikadin térilghu yer sétiwélishini chekleydighan qanun layihesi tonushturuldi

Amérika kéngesh palata ezasi mayk brawn (Sen. Mike Braun) Bashchiliqidiki bir türküm kéngesh palata ezaliri xitay we rosiye, iran we shimaliy koriye qatarliq amérikagha düshmen döletler puqralirining amérikada térilghu yer sétiwélishini chekleydighan qanun layihesini tonoshturghan.

“Foks” xewerlirining bildürüshiche, “Amérikaning térilghu yerlirini chet ellerning ziyinidin qoghdash” dep atilidighan bu qanun layihesi “Amérikaning düshmenliri hésablinidighan döletlerning igidarchiliqida, kontrolluqida yaki bashqurushida” bolghan kishilerning amérika zéminidiki hökümetke yaki xususiylargha tewe déhqanchiliq yerlirini ijarige élishi we sétiwélishini mexsus chekleydiken.

Bu cheklime amérika puqralirini yaki amérikada menggülük olturum bérilgen köchmenlerni öz ichige almaydiken.

Melum bolushiche, yuqiriqi 4 dölet amérika istixbarat da'irilirining yilliq doklatida “Amérikaning we uning ittipaqdashlirining menpe'etige qarshi usullar bilen öz menpe'etini ilgiri sürüsh iqtidari we muddi'asigha ige” dep körsitilgen iken.

Kéngesh palata ezasi mayk brawn mezkur qanun layihesi heqqidiki bayanatida mundaq dégen: “Xitayning amérikadiki térilghu yerlerge bolghan igidarliq hoquqi ötken on yilda 20 hessidin köprek ashqan. Biz amérikaning eng chong reqiblirining amérikaning térilghu yerlirini sétiwélip déhqanchiliq bilen teminlesh zenjirimizge tesir yetküzüshige yol qoymasliqimiz kérek.”

Melum bolushiche, bu qanun layihesi kéngesh palatasining her ikki partiyedin bolghan ezalirining qollishigha érishken iken.

Mezkur layihe, yuqiriqi 4 döletke munasiwetlik kishilerning yer ijarige bérish we sétiwélishni chekleshtin bashqa yene amérika yéza-igilik ministirliqining qurulush programmilirigha qatnishishinimu tosaydiken.