Amérika soda ministiri jina raymondo xitayning éksport kontrolluqini azaytish heqqidiki telipini ret qilghan

Amérika soda ministiri jina raymondo (Gina Raimondo) xitayning éksport kontrolluqini azaytish heqqidiki telipini ret qilghan.

Amérika birleshme agéntliqining xewer qilishiche, amérika soda ishliri ministiri jina raymondoning xitaydiki ziyariti mezgilide xitay rehberliri uningdin amérikaning herbiy ishlarda ishlitilidighan téxnikilarni xitaygha ötküzüp bermeslik heqqidiki éksport kontrolluqini azaytishni muraji'et qilghan. Emma jina raymondo bu telepni ret qilghan.

Raymondo mundaq dégen: “Ular téxnika mehsulatliri üstidiki éksport kontrolluqini azaytishni telep qildi. Men elwette buninggha yaq dédim. Chünki biz dölet bixeterlikige taqishidighan mesililerde hergiz muresseleshmeymiz” .

Jina raymondo sözide, ikki terepning amérikaning éksport kontrolluqi heqqide melumat almashturidighanliqini éytip, buning xitay terepning “Maslishishni ashurushini ümid qilimiz” , dégen.

Birleshme agéntliqining déyishiche, shi jinping hökümiti hazir chet'ellik meblegh salghuchilarning xitaygha bolghan qiziqishini eslige keltürüsh we iqtisadiy kasatchiliqni peseytish tirishchanliqining bir qismi süpitide chet'el shirketlirini xatirjem qilishqa tirishmaqtiken. Biraq jina raymondo xanim sözide, buning asan'gha toxtimaydighanliqini éytqan.

U xitay terep bilen bolghan uchrishishlar yaxshi ötken bolsimu, biraq buni derhal netije béridu, dep qarimaydighanliqini éytip “Heqiqiy heriket bolamdu-yoq biz buni aldimizda körimiz” dégen.

Raymondo yene eskertip ikki terepning uchrishishlirining qandaqtur muresse qilish yaki teslim bolushtin dérek bermeydighanliqi, eksiche aridiki uqushmasliqni azaytish we uchur almashturush üchün qedem tashlighanliq bolup hésablinidighanliqini bildürgen.