Jenét yélén, xitay import mehsulatlirining amérika yéngi sana'itige buzghunchiliq qilishigha yol qoymaydighanliqini agahlandurdi
2024.04.08
Ötken bir qanche kündin béri xitayda ziyarette boluwatqan amérika maliye ministiri jenét yélén, 8-aprél ziyaritining axirqi küni xitayni agahlandurup, erzan bahaliq xitay import tawarlirining amérika yéngi sana'itige buzghunchiliq qilishigha yol qoymaydighanliqini bildürgen. Jenét yélén béyjingda ötküzgen axbarat yighinida, pirézidént baydin 2000-yillarning bashlirida xitay tawarlirining amérikigha dolqundek éqip kirip, sana'et ishlepchiqirishi sahesidiki ikki milyon amérikiliqning ishsiz qélishini keltürüp chiqarghan “Xitay zerbisi” ning qayta yüz bérishige yol qoymaydighanliqini éytqan.
Melum bolushiche, 1990-yillirining axirliri amérikaning xitaygha sodida menggülük étibar bérish salahiyitini bérishi, arqidinla xitayning dunya soda teshkilatigha eza bolup kirishi, amérikani erzan bahaliq xitay tawarlirining tökme qilip sétilish bazirigha aylandurup qoyghan.
Halbuki, jenét yélén béyjingda, eger xitay döletning qoshumche yardimidiki tokluq aptomobil, aptomobil bataréyesi, küntaxta we bashqa yéshil énérgiye mehsulatlirini éksport qilishni dawamlashtursa, uninggha baj qoyush yaki bashqa qandaq soda tedbirlirini qollinidighanliqini tilgha almighan.
Roytérs agéntliqining bildürüshiche, jenét yélén yéqinqi toqquz ay ichide ikkinchi qétim xitayni ziyaret qilish arqiliq, xitayning ishlepchiqirishqa ichki éhtiyajdin halqighan halda meblegh sélishi, shundaqla bu mehsulatlarni éksport qilishni kücheytishi, amérika hem bashqa döletlerning karxanilirigha tehdit séliwatqanliqini eyibligen . Jenét yélén mundaq dégen: “Biz bu ehwalni burun körduq. On yillar awwal xitay xelq jumhuriyiti hökümitining keng kölemlik qollishi netijiside, xitayning polat mehsulatliri dunya bazirigha éqip kirip, dunya we amérika sana'itige buzghunchiliq qildi.” uning körsitishiche, “Pirézidénti baydin we u bu ré'alliqning qayta tekrarlinishigha yol qoymaydiken. Jenét yélinning bu agahlandurushi, xitay hökümitining yéqinqi 2-3 yildin béri, Uyghur diyarida yéngi matériyal we yéshil énérgiye ishlepchiqirishigha keng kölemlik meblegh sélip, chaqiliq , xoten qatarliq jaylarda zo ishlepchiqirish bazilirini qurghan bir waqitta éytilghan.