Amérikadiki dangliq shirket xojayinlirining xitayni ziyaret qilishi chong gholghula qozghighan

Amérikaning tésla shirkiti xojayini élon mask (Elon Musk) bilen amérikaning eng chong bankiliridin biri bolghan JP Morgan bash ijra'iye emeldari jeymi dimon (Jamie Dimon) 5-ayning axiriqi künliri xitayni ziyaret qilip, dunyadiki eng chong ikki iqtisadiy gewde bolghan amérika bilen xitayning hemkarliq munasiwitini yaxshilimaqchi bolghan.

“Aksyus” torining bu heqte bergen xewiride éytilishiche, amérika bilen xitay munasiwetliri yamanliship qéliwatqan bu weziyette bu ikki chong shirket  xojayinining xitayni ziyaret qilishi amérikada soda bilen siyasetning öz aldigha yol tutushidek chéchilangghuluqni namayen qilghan hemde zor gholghula peyda qilghan.

Élon mask 5-ayning 29-küni béyjinggha bérip, xitayning tashqi ishlar minisitiri, soda minisitiri we sana'et minsitiri bilen körüshken.  JP Morgan Bash ijra'iye emeldari jeymi dimon 5-ayning 31-küni shangxeydiki bir yighinda söz qilghan.

Xewerde tehlil qilinishiche, amérika bilen xitay munasiwetlirining nacharlishishigha egiship,  iqtisadiy jehette chek-chégra ayrishi izchil diqqet nuqtisi bolup kéliwatqan mesile bolup, bu ikki chong shirket xojayinining xitaydiki pa'aliyetliri amérika bilen xitayning asanliqche bir-biridin ayrilmaydighanliqini, chünki héch qaysi terepning buninggha téxi teyyarliq qilip bolalmighanliqini körsitidiken.

Ruytrés agéntliqining tiwittirgha chiqarghan xewirige qarighanda, élon mask xitayda alahide kütüwélishqa érishken we xitayni maxtapla yürgen.  Élon mask xitaydin menpe'et élishtin waz kechmigen bolup , uning shangxeydiki tésla zawuti élon maskqa zor payda yaratqan , tésla mashinisigha kéreklik litiy batariyesining 80 pirsenti xitayda yasilidiken. U 2022-yil 1-ayda ürümchide tésla shirkitining körgezme dukinini achqanda eyibleshke uchrighanidi.