Amérika xelq'ara diniy erkinlik komitétining re'isi geyl manshin: "Xitayning méni jazalishidin iptixarlandim"

Muxbirimiz erkin
2021-03-29
Share

Amérika xelq'ara diniy erkinlik komitétining re'isi géyl manshin xitayning Uyghurlargha tutqan mu'amilisini tenqid qilghanliqi üchün jazalan'ghanliqidin "Iptixarlan'ghanliqi" ni bildürgen. Roytérs agéntliqining xewer qilishiche, géyl manshin 27-mart bayanat élan qilip, xitay hökümitining uninggha imbargo yürgüzgenlikige inkas bildürgen. Xitay hökümiti 27-mart géyl manshin we shuningdek amérika xelq'ara diniy erkinlik komitétining mu'awin re'isi toni pérkénsni öz ichige alghan bir qanche amérika we kanada emeldarlirigha imbargo qoyghanliqini jakarlighan idi.

Géyl manshin bayanatida "Men kommunistik xitayning bu dölettiki diniy we étnik az sanliq milletlerge qarita sadir qilghan irqiy qirghinchiliq jinayitini pash qilip jazalan'ghanliqimdin iptixarliq hés qilimen" dégen. Uning körsitishiche, uning "Bu yil yazda xitayni ziyaret qilish pilani yoq" iken, shundaqla u "Xitayda yüz bergendek diniy erkinlikke qorqunchluq derijide dexli-teruz qilish heriketlirini sözleshtin toxtap qalmaydiken." xelq'ara diniy erkinlik komitétimu 29-mart kuni bayanat élan qilip, xitayning geyl manshin bilen toni pérkénsqa imbargo qoyghanliqini tenqid qilghan.

Mezkur komitét 29-mart bayanat élan qilip: "Xitay hökümitining sadir qiliwatqan irqiy qirghinchiliqi we insaniyetke qarshi jinayitige qarshi sözleshni hergizmu toxtitip qoymaydighanliqi" ni bildürgen. Bayanatta tekitlishiche, "Shinjangdiki wehshiylik we kompartiyening irqiy qirghinchiliqigha qarita terepsiz xelq'araliq tekshürüsh élip bérilishi hemde 2022-yildiki béyjing olimpik musabiqisini yötkesh yaki bayqut qilish üchün xelq'araliq tirishchanliq körsitilishi kérek" iken. Xitay hökümiti 27-mart géyl manshin, toni pérkéns qatarliqlargha imbargo qoyushning aldida amérika, kanada, yawropa ittipaqi we en'giliye xitayning Uyghur élidiki 4 neper emeldari we bir apparatini jazalighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet