Тед круз: "шинҗаңдики ирқий қирғинчилиққа җавабкар хитай әмәлдарлири исмини йошуруш вә кәчүрүм қилиниш һоқуқиға еришәлмәйду"

Мухбиримиз җәвлан
2021-04-22
Share
Тед круз: Америка кеңәш палата әзаси тед круз йиғинда сөзлимәктә. 2021-Йили 23-март, вашингтон.
REUTERS

Америка кеңәш палата әзаси тед круз 21-апрел өз тор бетидә баянат елан қилип, уйғур районидики ирқий қирғинчилиққа җавабкар хитай әмәлдарлириниң буниңдин кейин исмини йошуруш вә кәчүрүш қилиниш һоқуқиға еришәлмәйдиғанлиқини билдүргән. Баянатта мундақ дейилгән: "хитай компартийәси шинҗаңдики уйғурларға ирқий қирғинчилиқ йүргүзүватиду. Америка буниңға сүкүт қилмайду. Бу зораванлиққа җавабкар болған хитай компартийәси әзалири буниңдин кейин исмини йошуруш вә кәчүрүм қилиниш һоқуқиға еришәлмәйду. Мән хизмәтдашлиримниң хитай компартийәсиниң мәҗбурий бала чүшүрүш вә аялларни туғмас қиливетиш қатарлиқ вәһший җинайәтлиригә тақабил туруш үчүн җиддий һәрикәткә өткәнликигә рәһмәт ейтимән".

Буниңдин илгири америка кеңәш палатаси ташқий мунасивәт комитети һазирлиған "истратегийәлик риқабәт қануни" да тед крузниң уйғур вә башқа аз санлиқ милләтләргә ирқий қирғинчилиқ йүргүзүшкә җавабкар хитай әмәлдарлириниң җинайитини сүрүштүрүшкә даир икки түрлүк тәшәббуси оттуриға қоюлған. Мәзкур комитет мақуллиған ахирқи қанун лайиһәси хитайниң лагердики аялларға басқунчилиқ қилиш вә мәҗбурий бала чүшүрүш, туғмаслиқ оператсийәси қилдуруш вә башқа һамилдарлиқтин сақлиниш усуллирини қоллинишқа мәҗбурлаш қатарлиқ қилмишлириға мәсул хитай әмәлдарлирини җазалаш тәдбирлирини өз ичигә алидикән. Тед круз бу қанун лайиһәсигә йәнә бир түзитиш лайиһәси қошқан болуп, униңда хитайниң бигунаһ уйғурларни қамаш, қийнаш, басқунчилиқ қилиш вә уйғурларниң көпийишини чәкләш җинайитигә четишлиқ хитай әмәлдарлириниң һәммисини җазалаш мәқсәт қилинған.

Америка кеңәш палатаси ташқий мунасивәт комитети оттуриға қойған түзитиш лайиһәси тед крузниң сиясий тәшәббуслирини илгири сүрүш ролини ойнайдиған болуп, униңда уйғурлар мәсилисидин башқа йәнә тәйвән мәсилиси, әқлий мүлүк һоқуқи мәсилиси, хитайниң қолиға чүшүп қалған һолливодниң өзини өзи назарәт қилиш һоқуқини чәкләш мәсилисигә даир қанун лайиһәлири бар икән.

Америка кеңәш палата әзаси тед круз хитай һөкүмитиниң уйғурларға йүргүзүп келиватқан кишилик һоқуқ җинайәтлиригә изчил қарши туруп келиватқан болуп, 2019-йил коммунист хитайниң уйғурларни бастурушиға ярдәм бәргән ширкәтләрни җазалаш һәрикитигә рәһбәрлик қилғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт