Amérika hökümiti amérika tijaret we kinochiliq sahesini Uyghur élidiki zulumgha diqqet qilishqa chaqirmaqta

Muxbirimiz irade
2020-07-23
Élxet
Pikir
Share
Print

Amérika hökümiti amérikadiki tijaret sahesini Uyghur élidiki zulumgha herqandaq bir shekilde shérik bolup qalmasliqqa chaqirmaqta. Ular yéqinda élan qilghan ""Shinjangdiki soda teminat zenjiri heqqide tewsiye" ni oxshimighan munberlerde chüshendürüsh arqiliq amérika tijaret sahesi we holliywudqa qaratqan chaqiriqlirini kücheytti.

Amérika tashqi ishlar ministirliqining bayanatchisi morgan ortagus xanim 22-iyul küni "Foks" xewerler qanilida qilghan sözidimu bu mesilini qayta eskertti.

U mundaq dédi: "Biz yéqinda amérika tijaretchilirini xitaydiki mejburiy emgek lagérlirigha chétilip qalmasliq heqqide agahlandurduq. Amérika tijaret sahesi, holliywud we amérika jama'iti shinjangda yüz bériwatqan we biz ikkinchi dunya urushidin béri körüp baqmighan bu yirginishlik kishilik hoquq depsendichilikini tonup yétishi kérek."

1-Iyul küni amérika tashqi ishlar ministirliqi, xezine ministirliqi, soda ministirliqi we dölet xewpsizlik ministirliqi birlikte "Shinjangdiki soda teminat zenjiri heqqide tewsiye" namliq birleshme qararni élan qilip, xitay bilen soda qiliwatqan amérika shirketlirini Uyghur diyaridiki mejburiy emgekke chétishliq bolush éhtimali bolghan herqandaq teminat zenjirliridin hoshyar bolushqa chaqirghan idi. Uning arqidinla amérika soda ministirliqi yene "Xoten xawlin chach mehsulatliri zawuti", "Nenjing toqumichiliq guruhi", "Nenchang filim téxnologiyesi" qatarliq 11 shirket we zawutni "Qara tizimlik" ke kirgüzgen idi.

Nöwette xitay bilen tijaret qiliwatqan chong tiptiki amérika shirketliri we herqaysi dangliq markilar üstidiki bésim künsayin kücheymekte.

Toluq bet