Америка хәлқиниң хитайни дүшмән көрүши руслардин ешип чүшмәктә

Йеқинда тамамланған бир қетимлиқ дөләтлик рай синашта америка хәлқиниң 50 пирсәнти хитайни биринчи номурлуқ дүшмән, дәп қариған. Росийәни биринчи номурлуқ дүшмән дәп қариғанларниң сани 32 пирсәнт болған.

“төпилик” (The Hill) гезитиниң 6-марттики хәвиридә ейтилишичә, “галлуп рай синаш һәркити” дә бу хил йүзлиниш мәлум болған. Гәрчә росийәниң украинаға таҗавуз қилиши түпәйлидин америка малийәсидин зор бир қисим мәбләғ украинаға әвәтиливатқан болсиму америка хәлқиниң хитайни дүшмән, дәп қараш йүзлиниши изчил ешип маңған. Бу һал 2021-йилидики охшаш рай синаш паалийитидә бир қетим көрүлгән болуп, шу вақитта таҗсиман вирусниң тарқилиши буниңдики муһим сәвәб болған. Бу қетимқи рай синашта хитайни дүшмән дәп қариғанлар хитай җасуслуқ шарини буниңдики бир муһим дәлил сүпитидә оттуриға қойған.

Хәвәрдә ейтилишичә, росийәни әң чоң дүшмән, дәп қариғанларниң көп қисми демократчилар болған. Җумһурийәтчиләрниң көп қисми хитайни әң чоң дүшмән категорийисигә қойған. Бу қетимқи рай синаш феврал ейида тамам болған һәмдә америка тәвәсидики миңдин артуқ киши қатнашқан.