Amérika xelqining xitayni düshmen körüshi ruslardin éship chüshmekte

Yéqinda tamamlan'ghan bir qétimliq döletlik ray sinashta amérika xelqining 50 pirsenti xitayni birinchi nomurluq düshmen, dep qarighan. Rosiyeni birinchi nomurluq düshmen dep qarighanlarning sani 32 pirsent bolghan.

“Töpilik” (The Hill) gézitining 6-marttiki xewiride éytilishiche, “Gallup ray sinash herkiti” de bu xil yüzlinish melum bolghan. Gerche rosiyening ukra'inagha tajawuz qilishi tüpeylidin amérika maliyesidin zor bir qisim meblegh ukra'inagha ewetiliwatqan bolsimu amérika xelqining xitayni düshmen, dep qarash yüzlinishi izchil éship mangghan. Bu hal 2021-yilidiki oxshash ray sinash pa'aliyitide bir qétim körülgen bolup, shu waqitta tajsiman wirusning tarqilishi buningdiki muhim seweb bolghan. Bu qétimqi ray sinashta xitayni düshmen dep qarighanlar xitay jasusluq sharini buningdiki bir muhim delil süpitide otturigha qoyghan.

Xewerde éytilishiche, rosiyeni eng chong düshmen, dep qarighanlarning köp qismi démokratchilar bolghan. Jumhuriyetchilerning köp qismi xitayni eng chong düshmen katégoriyisige qoyghan. Bu qétimqi ray sinash féwral éyida tamam bolghan hemde amérika tewesidiki mingdin artuq kishi qatnashqan.