En'gliye armiyesining xitayda ishlen'gen herbiy formilarni kiyishi ghulghula peyda qilghan

 En'gliye hökümiti we en'gliyening dölet xewpsizliki emeldarliri gerche xitayning eng chong reqib we tehdit ikenlikini pat-pat tilgha élip tursimu, emma en'gliye armiyesining xitayda ishlen'gen herbiy formilarni kiyishini tosup qalalmighan.

En'gliyede chiqidighan “Kündilik pochta” (Daily Mail) géziti tori 20-may küni chiqarghan xewerge qarighanda, en'gliye hawa armiye alahide etriti, mergenler etritini öz ichige aliy herbiy qisimlirining formisi xitayda ishlen'gen؛ en'gliye xan jemeti hawa armiyesi qurulghanliqini xatirilesh uchushida kiyilgen herbiy formalarmu xitayda ishlen'gen. Buning üchün xitay bilen 70 milyon fond stérlingliq toxtam tüzülgen.

En'gliye xewpsizlik mutexesisliri xitayning hazir gherb dunyasigha tehdit shekillendürüwatqanliqini bildürgen, en'gliyening sabiq bash weziri liz tiras (Liz Truss) aldinqi hepte teywen'ge barghanda, en'gliyening soghuq munasiwetler urushi dewride turuwatqanliqini éytqanidi.

Xewerde éytilishiche, kishilik hoquq pa'aliyetchiliri en'gliye armiyesi kiyiwalghan formalarning lagérlargha solan'ghan Uyghurlar mejburiy ishlitilgen zawutlarning mehsulati bolushi mumkinlikini ilgiri sürgen.

Xitay éksport qilidighan paxta mehsulatining 84 pirsenti Uyghur rayonidin kélidighan bolup, bu rayonda 1 milyondin köp Uyghur we bashqa musulman milletler mejburiy emgekke sélinmaqta.

En'gliye armiyesining sabiq qomandani richard kémp (Richard Kemp) : “Bu kishini tenglikte qoyidighan, nomus qilarliq xataliq؛ qoralliq qisim tennerxi her qanche yuqiri bolsimu, en'gliyede ishlen'gen formalarni kiyishi, hergiz xitayning kiyimlirini kiymesliki kérek؛ xam eshyalar kishilik hoquq ehwali yaxshi dölettin kélishi, tehditkar, hujumchi dölettin kelmesliki kérek” dégen.