Antoni bilinkin: “Biz ittipaqdashlirimiz bilen hemkarliship, kishilik hoquq depsendichilikidin hésab sorashni kücheytimiz”
2021.03.22
22-Mart küni amérika tashqiy ishlar ministiri antoni blinkin amérika tashqi ishlar ministirlikining tor bétide bayanat élan qildi.
U mezkur bayanatta mundaq dégen: “Biz bügün ittipaqdashlirimiz bilen birlikte heriket qollinip, ‛yer shari magnétiski qanuni‚ gha asasen shinjang ishlepchiqirish-qurulush bingtu'eni partkomining sékritari wang jünjéng bilen shinjang j x idarisining bashliqi chén gominggha jaza yürgüzduq. Biz shinjangdiki milletler we étiqadchi xelq uchrawatqan éghir derijidiki kishilik hoquq depsendichilikige inkas bildürüsh üchün mushundaq qilduq. Wang jünjéng bilen chén goming qatarliqlar ular chiqarghan 13818-nomurluq memuriy buyruqqa asasen shinjangdiki qorqunchluq zorawanliq bilen biwasite chétishliq emeldarlar dep békitildi”.
Antoni bilinkén bu bayanatida wang jünjéngni qebih zorawanliq pilanini tüzgüchi, chén gomingni bolsa uni ijra qilghuchi dep körsetken bolup, bularning her ikkisi Uyghur rayonidiki kishilik hoquq we erkinlikke éghir derijide ziyankeshlik qilghan.
U bu bayanatida yene mundaq dégen: “Xelq'ara jem'iyet xitayni künséri eyiblewatqan bu mezgildimu xitay yenila shinjangda irqiy qirghinchiliq we insaniyetke qarshi jinayet sadir qilmaqta. Amérika xitay hökümitini Uyghur we bashqa milletlerni basturushni toxtitishqa, lagér we qamaqxanilargha xalighanche solap qoyghan insanlarning hemmisini qoyup bérishke yene chaqiridu. Biz bügün öz ittipaqdashlirimiz bolghan en'giliye, kanada we yawropa ittipaqigha hemdem bolush, ularning herikitige qétilish üchün bu heriketni qollanduq. Ittipaqdashlirimiz yene shinjang we bashqa döletlerde yüz bergen zorawanliqqa munasiwetlik kishilik hoquq jinayetchilirini jazalidi. Bu heriketler shuni körsitiduki, biz köp tereplime hemkarlishish arqiliq kishilk hoquqni qoghdashni kücheytimiz hemde xitay kompartiyesining qebih qilmishliridin hésab alimiz”.
Antoni blinkén yene amérikaning kishilik hoquqni qoghdashtiki küchlük iradisini bildürüp mundaq dégen: “Amérika ‛yer shari magnétiski qanuni‚ arqiliq éghir derijidiki kishilik hoquq depsendichilikige zerbe bérishte yétekchilik rol oynawatidu. Mezkur qanun kishilik hoquqni depsende qilghuchilargha zerbe bérish we ulardin hésab élishning muhim wastisidur. Bügün amérika yawropa ittipaqining bu wasitidin paydilinip, dunya miqyasidiki kishilik hoquqni depsende qilghuchilarni jazalash herikitini qollaydu. Atlantik okyandin halqighan bu birleshme inkas kishilik hoquqni depsende qilghuchilargha bérilgen küchlük ségnaldur؛ biz yene öz hemkarlashquchilirimiz bilen birlikte téximu ilgiriligen halda heriket qollinimiz. Biz dunyaning her qaysi jayliridiki ittipaqdashlirimiz bilen bir septe turup, xitayni bu jinayetni derhal toxtitishqa, ziyankeshlikke uchrighuchilargha hésab bérishke chaqirimiz”.