Ситокһолмдики аптомобил һуҗуминиң гумандари өзбек пуқраси икәнлики, униң қолға елинғанлиқи мәлум

Мухбиримиз җүмә
2017-04-08
Share


Җүмә күни шиветсийәниң ситокһолм шәһиридә йүз бәргән аптомобил һуҗуминиң гумандари 39 яшлиқ өзбек пуқраси икәнлики, униң қолға елинғанлиқи мәлум.

Телеграф гезитиниң хәвәр қилишичә, сақчилар террор гумандарини һуҗум мәркизидин 40 километир йирақлиқтики марста шәһиридә қолға чүшүргән, гумандар һуҗумни өз қилғанлиқини иқрар қилған. Әмма сақчи даирилири униң исмини техи ашкарилимиған.

Шиветсийә даирилириниң шәнбә күни билдүрүшичә, мәзкур гумандар шиветсийә сақчи даирилириниң көзитиши астиға елинған бири болуп, униң компютеридин даиш елан қилған тәшвиқат филими тепилған.

Җүмә күни бир террор гумандари оғриланған пива тошуш аптомобилини һәйдәп ситокһолмдики бир мәркизи сода кочисиға һуҗум қилған. Һуҗумда 5 адәм өлгән, 14 адәм яриланған иди.

Кейин сақчилар аптомобилдин өйдә ясалған бир партлитиш үскүниси тапқан.

Бу һуҗум өткәнки икки һәптә ичидә явропада йүз бәргән иккинчи қетимлиқ аптомобил һуҗуми һесаблиниду.

22-Март лондон вестминстер көврүкидә аптомобиллиқ террор һуҗуми йүз берип, һуҗум 5 адәмниң җениға замин болған, 50 дин артуқ адәмни яриландурған, һуҗумчи сақчиларниң оқида ярилинип, кейин дохтурханида өлүп кәткән иди.

Бу нөвәт ситокһолмда йүз бәргән һуҗумниң лондонда йүз бәргән һуҗум билән охшашлиқи диққәтни чәкмәктә.

Лондондики һуҗумни “даиш” террор тәшкилати үстигә алидиғанлиқини билдүргән болсиму, ситокһолмдики һуҗумдики мәсулийәтни һазирчә бирәр тәшкилат өз үстигә алмиди.

Телеграф гезитиниң нәқил қилишичә, шиветсийә баш вәзири стефан лофвен һуҗумдики аламәтләрниң һәммиси буниң бир террорлуқ һуҗуми икәнликини көрситидиғанлиқини билдүрди.

Аптомобил билән елип берилған охшаш шәкилдики террорлуқ һуҗумлири илгири фирансийәниң нис шәһири, германийәниң берлин шәһиридиму йүз бәргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт