Sitokholmdiki aptomobil hujumining gumandari özbék puqrasi ikenliki, uning qolgha élin'ghanliqi melum

Muxbirimiz jüme
2017-04-08
Share


Jüme küni shiwétsiyening sitokholm shehiride yüz bergen aptomobil hujumining gumandari 39 yashliq özbék puqrasi ikenliki, uning qolgha élin'ghanliqi melum.

Télégraf gézitining xewer qilishiche, saqchilar térror gumandarini hujum merkizidin 40 kilométir yiraqliqtiki marsta shehiride qolgha chüshürgen, gumandar hujumni öz qilghanliqini iqrar qilghan. Emma saqchi da'iriliri uning ismini téxi ashkarilimighan.

Shiwétsiye da'irilirining shenbe küni bildürüshiche, mezkur gumandar shiwétsiye saqchi da'irilirining közitishi astigha élin'ghan biri bolup, uning kompyutéridin da'ish élan qilghan teshwiqat filimi tépilghan.

Jüme küni bir térror gumandari oghrilan'ghan piwa toshush aptomobilini heydep sitokholmdiki bir merkizi soda kochisigha hujum qilghan. Hujumda 5 adem ölgen, 14 adem yarilan'ghan idi.

Kéyin saqchilar aptomobildin öyde yasalghan bir partlitish üskünisi tapqan.

Bu hujum ötkenki ikki hepte ichide yawropada yüz bergen ikkinchi qétimliq aptomobil hujumi hésablinidu.

22-Mart london wéstminstér köwrükide aptomobilliq térror hujumi yüz bérip, hujum 5 ademning jénigha zamin bolghan, 50 din artuq ademni yarilandurghan, hujumchi saqchilarning oqida yarilinip, kéyin doxturxanida ölüp ketken idi.

Bu nöwet sitokholmda yüz bergen hujumning londonda yüz bergen hujum bilen oxshashliqi diqqetni chekmekte.

Londondiki hujumni "Da'ish" térror teshkilati üstige alidighanliqini bildürgen bolsimu, sitokholmdiki hujumdiki mes'uliyetni hazirche birer teshkilat öz üstige almidi.

Télégraf gézitining neqil qilishiche, shiwétsiye bash weziri stéfan lofwén hujumdiki alametlerning hemmisi buning bir térrorluq hujumi ikenlikini körsitidighanliqini bildürdi.

Aptomobil bilen élip bérilghan oxshash shekildiki térrorluq hujumliri ilgiri firansiyening nis shehiri, gérmaniyening bérlin shehiridimu yüz bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet