Җеҗяң ‍өлкиси ақсу вилайитигә қаратқан нишанлиқ ярдәмни күчәйтидиғанлиқини билдүргән

Мухбиримиз әркин
2021-08-20
Share

Хитайниң җеҗяң ‍өлкиси уйғур елиниң ақсу вилайитигә қарита "нишанлиқ ярдәм" ни күчәйтидиғанлиқи, аталмиш "ярдәм түрлири" ни техиму әлалаштуридиғанлиқини билдүргән. Муһаҗирәттики уйғур тәшкилатлири хитай өлкилириниң уйғур районидики һәрқайсий вилайәтләргә қаратқан бу аталмиш "ярдәм" түрини, хитайниң уйғур илини парчилап ассимилатсийә қилиш вә байлиқлирини булаң-талаң қилиш истратегийәсиниң бир қисми, дәп әйибләп кәлмәктә.

"шинҗаң гезити" ниң хәвәр қилишичә, бу вәдини җеҗяң ‍өлкилик парткомниң секритари йүән җяҗүн башчилиқидики җеҗяң вәкилләр өмики 17-авғусттин 19-авғустқичә үрүмчи вә ақсуда зиярәттә болғанда бәргән.

Хитай һөкүмити 2009-йили йүз бәргән үрүмчи "5-июл қирғинчилиқи" дин кейин, "шинҗаңға нишанлиқ ярдәм бериш" намида уйғур елиниң 19 вилайәт вә шәһирини хитайниң 19 ‍өлкә вә шәһригә бөлүп бәргән. Хитай һөкүмити аталмиш "нишанлиқ ярдәм" ниң шинҗаңниң иқтисадий тәрәққиятиға түрткә болидиғанлиқини ейтсиму, бирақ уйғур тәшкилатлири хитайниң бу арқилиқ районға техиму көп хитай көчмәнлирини көчүрүп чиқидиғанлиқини, уйғурларни аҗизлаштуруп, "ирқий қирғинчилиқ" қилишниң асасини һазирлиғанлиқини илгири сүрүп кәлгән.

"шинҗаң гезити" ниң хәвиридә ейтилишичә, йүән җяҗүн 19-авғуст чен чүәнго, шоөһрәт закир, ваң җүнҗең қатарлиқлар билән ‍өткүзүлгән йиғинда "мәркизий һөкүмәтниң бир туташ орунлаштурушиға әгишип, йәрлик вә биңтуән билән һәмкарлишидиғанлиқи, идийәни үзлүксиз йеңилап, тәдбирләрни әлалаштуруп, нәтиҗини йезиларни гүлләндүрүш билән мустәһкәмләйдиғанлиқи" ни тәкитлигән. Униң ейтишичә, җеҗяң өлкиси "шинҗаңға болған санаәт ярдимини чоңқурлаштуруп, шинҗаңға әқлий ярдәм беришни, йеңи тәрәққият әндизисигә сиңишип, ул әслиһәни күчәйтишкә, чеграни муқимлаштурушқа, йәрликтики рәқәмләштүрүшни өстүрүшкә актип ярдәм беридикән."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт