Хитай даирилири қариқашниң арамазар кәнтидә сабиқ кәнт секретарини қолға алған

Хитай даирилири 28‏-июн хотәнниң қарақаш наһийиси ақсарай йезисиниң арамазар кәнтидә пуқраларни аммиви йиғинға чақирип, мәзкур кәнтиниң сабиқ секретари тохти мәмәттурсунни қолға алған.

Уйғур аптоном районлуқ интизам тәкшүрүш-ревизийә ториниң хәвиридә илгири сүрүшичә, тохти мәмәт турсун интизамға хилаплиқ қилиш, амминиң мәнпәәтигә зиян селиш, аммиға тәһдит селиш, җинайәткә четишлиқ, дәп әйиблинип, вәзиписидин елип ташланған. Партийидин қоғлап чиқирилип, аммиви йиғинда қолға елинған вә тәптиш даирилириниң бир тәрәп қилишиға тапшуруп берилгән. 

Хитай даирилири бу йил 1‏-айдин бери, уйғур районида интизамға хилаплиқ қилғанларни, “икки йүзлимичи” йәрлик кадирларни тазилаш вә җазалаш һәрикити қозғап, нурғун йәрлик кадирни вәзиписидин елип ташлиған, партийидин қоғлап чиқарған вә җазалиған. Хотән “икки йүзлимичи” йәрлик кадирларни тазилаш вә җазалаш һәрикити әң қаттиқ елип бериливатқан вилайәт болуп, йәрлик даириләр бу йил 4‏-айда 97 нәпәр йәрлик кадирға чарә көргәнликини елан қилған.Бирақ, хитай даирилириниң һәрикити уйғур тәшкилатлириниң диққитини қозғиған. Улар хитай даирилириниң уйғурларни йәрлик һакимийәт системисидин сиқип чиқириватқанлиқини илгири сүргән иди. Кишилик һоқуқ тәшкилатлириниң агаһландурушичә, хитай даирилириниң кишиләрни аммиви йиғинда қолға елиштәк бу хил һәрикити, тутқунларниң адил сотлинишиға қарита җиддий әндишә пәйда қилмақтикән.