Uyghur qizi arfiye “Kelgüsige tesir körsitidighan 100 shexs” tizimlikidin orun aldi

Washin'gtondin muxbirimiz irade teyyarlidi
2023.09.15

Bu yil 4-ayning 24-küni yaponiye parlaméntining ezaliqigha saylan'ghan Uyghur qizi arfiye xelq'aradiki nopuzluq zhurnal bolghan “Dewr” zhurnilining 2023-yilliq “Kelgüsige tesir körsitidighan 100 shexs” (TIME100 Next) tizimlikidin orun alghan.

Bu tizimlik saghlamliq, kilimat, soda, tenterbiye, sen'et we bashqa jehetlerde qed kötürüwatqan shexslerni teqdirleshni meqset qilghan bolup, uninggha jem'iyettiki eng jiddiy mesililerni yéngi hel qilish charisi bilen teminligen alimlar, siyasetchiler, bash ijra'iye emeldarliri, sen'etkarlar, alem uchquchiliri, kutupxana xizmetchisi qatarliq hersahedin shexsler kirgüzülgeniken.

“Dewr” zhurnili arfiyening bu tizimlikke kirgüzülüshining sewebi heqqide toxtalghanda bu yil 4-ayda yaponiye parlamént ezaliqigha saylan'ghan arfiyening yaponiye siyaset sahesidiki “Yashan'ghan erlerning hakimiyiti” ge riqabet élan qilghanliqini eskertken. Uningda mundaq déyilgen:

“Yaponiyede texminen 90% parlamént yaki ministirliq wezipisini erler igiligen. Parlamént ezalirining otturiche yéshi 56 yash. . . Emma Uyghur we özbék eslidin bolghan, 34 yashliq arfiye éri. . . . Yaponiyediki köp xilliqning chémpiyonigha aylandi”

“Dewr” zhurnili tonushturushida yene, arfiyening döletni bashquruwatqan “Yashan'ghan erler kulubi” ge tehdit bolush emes, belki ular bilen hemkarliq ornitish asasida hakimiyet béshidiki libéral démokratlar partiyesi ichide siyaset qiliwatqanliqini yazghan. Arfiyening yene bash ministir fumi'o kishidaning nurghun siyasetlirini qollawatqanliqini, uning yaponiyening dangliq siyasetchiliridin bolghan sanliq melumat ishliri ministiri taro kononing qollishigha érishkenlikini bayan qilip: “Arfiye éri döletning heqiqiy köp xilliqini yaxshi namayan qilish üchün özini köwrük qilip tiklidi”. Dégen.

Uyghur qizi arfiye bu yil 4-ayda yaponiye parlamént ezaliqigha saylan'ghanda xelq'araliq axbaratlarning küchlük diqqitige érishken. Arfiye eyni chaghda aksyos (Axios) torining ziyaritini qobul qilghanda Uyghurlarning béshigha kéliwatqan külpetni eslitip turup “Uyghurlar hazir irqiy qirghinchiliqning qurbani boluwatqan bir millet bolsimu, uning xuddi bashqa milletlerge oxshash qed kötürüp güllinishke layiq bir xelq ikenlikini, buni öz xizmiti arqiliq namayan qilip bérishni ümid qilidighanliqini” bildürgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.