Уйғур елида асасий қатлам кадир-әмәлдарлирини җазалаш һәрикити давам қилмақта

Мухбиримиз ирадә
2021-05-06
Share

Уйғур елидики һөкүмәт тор бәтлири 6-май күнидики хәвиридә, атуш вә чөчәктин болуп 6 нәпәр кадир-әмәлдарниң "мәркәзниң 8 түрлүк бәлгилимиси" гә хилаплиқ қилғанлиқини илгири сүрди. Мәзкур 6 нәпәр әмәлдарниң 2 нәпири уйғур, 1 нәпириниң қазақлиқи мәлум болмақта.

Уларниң бири атуш шәһәрлик хәлқ сот мәһкимиси дело турғузуш бөлүминиң ярдәмчи сотчиси җүрәт исмайил болуп, хәвәрдә "җүрәт исмайил дело баһалаш хизмитини вақтида яхши қилмиған, нәтиҗидә тәрәпләр җазаға тартилмай начар тәсир пәйда қилғанлиқи үчүн партийә тәрипидин қаттиқ агаһландурулди," дейилгән.

Йәнә бири атуш шәһири үстүнатуш базири дохтурхана шөбисиниң мудири ялқун сулайман болуп, даириләр уни "һөкүмәткә тәвә машиниларниң газ картисини башқурушта қалаймиқанчилиқ пәйда қилғанлиқтин бир қанчә башқуруш обейкти һөкүмәтниң газ картисини қалаймиқан ишлитип газ қачиливалди," дәп әйиблигән.

Хитай даирилири йеқиндин буян уйғур елида "мәркәзниң 8 түрлүк бәлгилисимигә хилаплиқ қилиш" дегән нам билән асасий қатламлардики кадир-әмәлдарларни җазалаш һәрикити қозғиған. Чәт әлләрдики көзәтчиләр хитай һөкүмити һазир хәлқарада уйғурларға қаритиватқан ирқий қирғинчилиқи түпәйлидин қаттиқ тәнқид вә бесимға дуч кәлгәнликтин, райондики вәзийәтни йәниму чиңитип, кадир-әмәлдарларниң йүрикини қисишни мәқсәт қиливатқанлиқини мөлчәрлимәктә.

Хитайчә "тәңритағ" тори йеқинда елан қилған бир хәвиридә 2021-йилиниң биринчи пәслидила уйғур елидики интизам тәкшүрүш вә назарәт қилиш органлири тәрипидин җазаланған асасий қатлам кадир-әмәлдарлириниң 4556 нәпәр, тәнқидләп тәрбийәләнгәнләрниң16226 нәпәрликини елан қилған. Булар ичидә уйғурларниң қанчилик санни тәшкил қилидиғанлиқи ениқ дейилмигән болсиму, бирақ һөкүмәт таратқулирида исимлири ашкариланған исимлардин буларниң тәңдин толисиниң уйғур миллитидин икәнликини пәрәз қилиш мумкин икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт