Amérika awam we kéngesh palatalirida "Tyen'enmén weqesi" we xongkong heqqide qarar layihesi sunuldi

Muxbirimiz erkin
2020-06-05
Share

Amérika awam we kéngesh palatalirining bir türküm ezasi her ikki palatada "Tyen'enmén weqesi" ning 31 yilliqini xatirilesh, xitayning xongkongda erkinlik we aptonomiye wedisige xilapliq qilghanliqini tenqidlesh qarar layihesi sun'ghan. Qarar layiheside amérika hökümitining xelq'ara ittipaq teshkillishi, barliq diplomatik wastilarni we nishanliq émbargo qorallirini ishqa sélip, xongkong xelqining kishilik hoquqini qoghdishi telep qilin'ghan. Mezkur qarar layihesini awam palatasida kristofér simit bilen jeymis mikgowérn, kéngesh palatasida marko rubi'o bilen jef mérkléy otturigha qoyghan.

Awam palata ezasi kristofér simit bu heqtiki bayanatida, "Bu qarar arqiliq tyen'enmén qirghinchiliqini xatirileydighanliqi" ni bildürgen. Awam palata ezasi jéymis mikgowérn bolsa, hökümetning barliq diplomatik wastilarni ishqa sélip, xongkongda qanun we erkinlikni qoghdishini telep qilghan.

Kéngesh palata ezasi marko rubi'o bu heqtiki bayanatida, "Xitay hökümiti we kompartiyesi öz puqralirini shundaqla Uyghur we tibetlerni izchil sistémiliq basturup, xongkong aptonomiyesige buzghunchiliq qiliwatqan bir waqitta, amérika ölgenlerning eslimilirini hörmetleydu, ularning qaldurghan mirasini saqlap qalidu" dégen.

Kéngesh palata ezasi jef mérkléyning tekitlishiche, bu qarar layihesi xitay hökümitige "Amérikaning tyen'enmén meydanidiki qurbanlar we xongkongdiki démokratiyeni yaqlighuchilardin tartip, shinjangda jazaliniwatqan milyonlighan Uyghurlarghiche erkinlikni qoghdighuchilar teripide turidighanliqi heqqide küchlük signal béridi" ken.

Melum bolushiche, nöwette mezkur qarar layihesini dayan faynishtayin stéf deynés, tod yong, koréy gradnér, rik skot, josh xawléy, tam sozi, wiki xartler, ben mikadams qatarliq jumhuriyetchi we démokratlar partiyesidin bolghan kéngesh hem awam palata ezaliri qollighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet