Австралийәниң “сидней әтигәнлик хәвәрчи” гезити рабийә қадир һәққидә мақалә елан қилди

Мухбиримиз әркин
2018.04.09
Share on WhatsApp
Share on WhatsApp

Австралийәниң “сидней әтигәнлик хәвәрчи” гезити чоң һәҗимлик мақалә елан қилип, д у қ алий рәһбири рабийә қадир ханимниң йеқинда елип барған австралийә зиярити, униң уйғур районидики йепиқ “тәрбийәләш лагер” лири һәққидики әндишилирини тонуштурди.

Мақалида 71 яшлиқ рабийә қадир ханимниң 37 нәпәр аилә әзасиниң мәзкур “тәрбийәләш лагер” лириға соланғанлиқи әскәртилип, униң бу лагерларға қарши әң ахирқи тиришчанлиқларни көрситиватқанлиқини тәкитлигән.

Мақалида униң сөзи нәқил кәлтүрүп, бир милйондәк уйғурниң бу лагерларға соланғанлиқи, хитай компартийәсиниң уларни солашта қануни тәртипләрни бир чәткә қайрип қойғанлиқини билдүргән.

Лагерлар мәсилиси муһаҗирәттики уйғурларниң күнтәртипидики әң җиддий мәсилә. Йеқинда америка дөләт мәҗлисиниң ғоллуқ икки әзаси америкиниң бейҗиңдики баш әлчисигә мәктуп йезип, униң йепиқ “тәрбийәләш лагер” лирини тәкшүрүшни, әркин асия радийоси мухбирлириниң вә рабийә қадир ханимниң аилә-тавабиатлириниң ақивитини сүрүштүрүшни тәләп қилған.

Авам палата әзаси кристофир симит билән кеңәш палата әзаси марку рубию мәктупида, америка һөкүмитиниң буниңға күчлүк инкас қайтуруши керәкликини билдүргән иди.

“сидней әтигәнлик хәвәрчи” гезитидә елан қилинған “хитай унтулуп кетишни арзу қилидиған аял” сәрләвһилик мақалида йәнә, рабийә қадир ханимниң бу қетимқи австралийә зияритидә австралийә парламент әзаси майкел данбий билән көрүшкәнлики тилға елинип, майкел данбийниң “уйғурларниң ислами фундаминтализм билән һечқандақ четишлиқ тарихий йоқ.

Уларниң қәдимий мәдәнийити вә тарихий тибәтләргә охшашла йоқитиливатиду. Бу хитай асаси қанунидики аз санлиқ милләтләрниң һоқуқиға хилап” дегән сөзлирини нәқил кәлтүрүлгән.

Рабийә қадир ханим австралийәни тунҗи қетим 2009‏-йили зиярәт қилған. Униң шу қетимқи зиярити хитай һөкүмити вә ахбаратиниң қаттиқ қаршилиқиға учриған. У бу қетимқи зияритидә австралийәдики уйғурларниң канберра шәһиридә австралийә парламенти, америка вә хитайниң канберрадики әлчиханилириниң алдида өткүзүлгән намайишлириға қатнашқан иди.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.