Awstraliyede xitay bash ministiri li chyangning ziyaritige qarshi namayish élip bérildi

Washin'gtondin muxbirimiz jewlan teyyarlidi
2024.06.17

Xitay bash ministiri li chyang 17-iyun künidin bashlap awstraliyediki 4 künlük ziyaritini bashlighan bolup, uning bu ziyariti awstraliyediki Uyghurlar, tibetler, xitay démokratchiliri we falun'gungchilarning qattiq qarshiliqigha duch kelgen. Namayishchilar awstraliyening parlamént binasi etrapida pa'aliyet qiliwatqanda, xitayning hökümet terepdarliri bilen awstraliye saqchilirining tosqunluqigha uchrighan. Ikki terep otturisida xéli éghir sürkilish we toqunushlar bolghan.

Awstraliye alahide radiyo qanili (SBS) 17-iyun bergen xewerde éytilishiche, awstraliyede yashawatqan Uyghurlar, tibetler we xitaylardin teshkil tapqan kishilik hoquq qoghdighuchiliri awstraliyening kanbérra shehiridiki parlamént binasi etrapida xitay bash ministiri li chiyanggha qarshi sho'ar towlighan. Bezi xitay namayishchiliri xitay kompartiyesining bayriqini köydürmekchi bolghan. Awstraliye fédératsiye saqchiliri ularning qolidin bayraqni tartiwalghan we namayishchilargha zorluq küch ishletken. Namayishchilardin biri “Tinchliqni buzghan” dep qarilip qolgha élin'ghan.

Awstraliye parlamént binasi sirtida jiddiy qarshiliq we namayishlar boluwatqanda, parlamént binasi ichide xitay bash ministiri li chiyangni kütüwélish murasimi daghdughiliq ötküzülgen. Awstraliye hökümitining kishilik hoquq depsendichiliki eng éghir bolghan xitay rehbirini bu shekilde kütüwélishi namayishchilarning küchlük naraziliqini qozghighan.

Aldinqi heptining axiri awstraliyege kelgen li chyang, xitayning 7 yildin buyan awstraliyeni ziyaret qilghan tunji bash ministiri bolup, u kélipla awstraliye bilen xitayning munasiwitini ongshaydighanliqini, iqtisad-soda, sayahetchilik ishlirida hemkarliqni qayta kücheytidighanliqini bildürgen. Awstraliye bash ministiri antoni albénizi (Antony Albanese) 2023-yil 11-ayda xitayni ziyaret qilghan bolup, uning bu qétim li chyangni alahide kütüwélishi we xitay bilen munasiwetni qayta yaxshilash iradisini bildürüshi kishilik hoquq teshkilatliri we pa'aliyetchilirining naraziliqigha uchrighan.

En'giliye “Muhapizetchi” torining 16-iyun küni bergen xewirige qarighanda, kishilik hoquq qoghdighuchiliri awstraliye bash ministiri antoni albénizige chaqiriq qilip, xitay bash ministiri li chyang bilen körüshkende, soda-iqtisadni qayta janlandurushni tilgha élishtin awwal, xitaydiki kishilik hoquq depsendichiliki, jümlidin mejburiy emgek mesilisige obdan qarap chiqishqa ündigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.