Awstraliye bilen yéngi zéllandiye: "Uyghurlarning weziyitidin qattiq endishe qiliwatimiz"

Muxbirimiz erkin
2021-03-23
Share

Awstraliye bilen yéngi zéllandiye hökümetliri 23-mart birleshme bayanat élan qilip, Uyghurlarning weziyitidin qattiq endishe qiliwatqanliqi, yawropa ittipaqi, en'giliye, kanada we amérikaning xitay kompartiyesining Uyghur élidiki emeldarlirigha yürgüzgen jazalash tedbirlirini qollaydighanliqini bildürgen.

Bayanatta awstraliye we yéngi zéllandiye hökümetlirining bügün "Shinjangdiki Uyghur we bashqa musulman az sanliq milletlerge qaritilghan éghir kishilik hoquq depsendichilikige a'it künséri köpiyiwatqan ishenchilik doklatlardin qattiq endishe qiliwatqanliqi" tekitlen'gen.

Bu yazma bayanat awstraliye tashqiy ishlar we soda ministéri marisa péyn bilen yéngi zéllandiye tashqiy ishlar ministiri nana'iy maxutaning namida élan qilin'ghan. Bayanatta yene Uyghurlargha qaritilghan éghir kishilik hoquq depsendichilikige a'it "Éniq delillerning barliqi" eskertilip, "Awstraliye bilen yéngi zéllandiye kanada, yawropa ititpaqi, en'giliye we amérikaning tönügün kéchide élan qilin'ghan imbargo tedbirlirini qarshi alidu. Biz bu döletlerning, jümlidin pütün awstraliye we yéngi zéllandiye jama'etliridimu mewjut bolghan bu chongqur endishilerge ortaqlishimiz," déyilgen.

Awstraliye we yéngi zéllandiye hökümetlirining bayanati awstraliye parlaméntining awam palatasi 22-mart Uyghurlar heqqidiki bir qarar teklip layihesi munazire qilghanning arqisidinla élan qilindi. Bu teklip layihesini lébirallar partiyesidin bolghan awam palata ezasi kewén andréws bilen ishchilar partiyesidin bolghan awam palata ezasi krist héyis sun'ghan bolup, uningda awstraliye hökümitining b d t gha Uyghur élida tekshürüsh élip bérish toghrisida bésim ishlitishi, "Zamaniwi qulluq we teminat zenjirliridiki mejburiy emgekke qarshi tedbirlerni élishi" telep qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet