MRT Axbarat guruhi: "Yéngi shinjangda meschitler taqalghan, tawapgahlar chéqilghan"

Muxbirimiz erkin
2021-07-26
Share

Amérikadiki MRT namliq bir axbarat guruhi ötken hepte ‍öz muxbirining Uyghur élide élip barghan bir ziyaret xatirisini élan qilip, Uyghur élide meschit, tawapgah we tarixiy orunlarning qandaq buzghunchiliqqa uchrawatqanliqi, xitayning siyasiy sayahet arqiliq Uyghurlarning ré'alliqini qandaq burmilawatqanliqini ashkarilighan.

Ziyaret xatiriside éytilishiche, muxbir Uyghur medeniyitidiki halqiliq sheherlerning biri bolghan qeshqerde 30 meschitni tapqan bolsimu, lékin ulardin peqet héytgah jamesini öz ichige alghan üchla meschit ‍özlirining ibadetxaniliq xasliqini saqlap qalghan. Muxbir ziyaret xatiriside qalghan meschitlerning korona wirusi waksina merkizi, xatire buyumlar dukini, qehwexana dégendek orunlargha özgertilgenliki, bir meschitning xitay sayahetchiler üchün obornige aylan'ghanliqini bildürgen.

Ziyaret xatiriside yene bu ehwalning noqul qeshqerge xas hadise emesliki, xotendimu ‍oxshash ehwalning mewjutluqi, xotendiki eng qaynaq bazarlarning biri bolghan at bazirining tüzlinip, yéqinda baghchigha aylandurulghanliqi we bu yerdiki meschitning ghayib bolghanliqi bildürülgen.

Ziyaret xatiriside éytilishiche, mezkur rayondiki qélip qalghan bir qanche meschit peqet jüme namizigha échilidiken, qalghan waqitlarda bolsa taqaq turidiken.

Ziyaret xatiriside, bir xitay sayahet yétekchisining bir sözi alahide neqil keltürülgen. Bu sayahet yétekchisi meschitler taqilip "Yaxshi bolghanliqi" ni bildürgen. U: "Islamda her bir qanche ahalining bir meschiti bolushni telep qilinidu. Uning qurulushi we asrash pulini shu mehellidikiler tölishi kérek. Hazir bu meschitler taqilip, pulini yighalaydighan we bashqa ishlargha meblegh qilip salalaydighan boldi" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet