Уйғур зиялийлириға қилинған "хитаб" та тарихи пакитлар арқилиқ бөлгүнчиликкә қарши күрәш тәләп қилинди

Мухбиримиз ирадә
2017-04-20
Share


Уйғур елидә хитай һөкүмити тәрипидин бәс-бәстә елип бериливатқан "уйғур хәлқигә хитаб қилиш" һәрикити давамида уйғур аптоном районлуқ иҗтимаий пәнләр академийиси парткоминиң секретари, муавин идарә башлиқи абләт мәмәтму бир парчә хитабнамә елан қилип, уйғур елиниң "әзәлдин хитайниң айрилмас бир парчиси" икәнликини тәкитлигән.

Тәңритағ торида пәйшәнбә күни елан қилинған мәзкур хитабнамидә у, уйғур зиялийлири уйғур елиниң аз санлиқ милләтләр мәдәнийити вә һазирқи заман мәдәнийити тәтқиқатини күчәйтиш, милләтләр тарихи вә дин қатарлиқ зор тарихий вә әмәлий мәсилиләрни тәтқиқ қилиш арқилиқ "үч хил күчләр" ниң бөлгүнчилик идийилиригә зәрбә беришимиз керәк, дәп көрсәткән.

Уйғур елиниң партком секретари чен чүәнгому 22-март ечилған археологийә хизмәт йиғинида сөз қилип, археологийә хизмитиниң "бөлгүнчилик" кә қарши күрәшни нишан қилиши керәкликини билдүрүш билән биргә, "мәдәний ядикарлиқларни бөлгүнчилик идийисигә қарши күрәш үчүн хизмәт қилдурулуши" ни тәләп қилған иди.

Абләт мәмәтниң "хитаби" уйғур аптоном районлуқ иҗтимаий пәнләр академийисиниң сабиқ муавин башлиқи абдуразақ сайим "партийә интизамиға хилаплиқ қилиш" билән вәзиписидин қалдурулуп, тәптиш органлириға тапшуруп берилгән мәзгилгә тоғра кәлди.

Хитай даирилири абдуразақ сайимниң делосида "парихорлуқ вә чириклик" дегән қелиплашқан сөзләрни қолланған болсиму, әмма униң бир қанчә уйғур зиялийси билән бирла вақитта тутқун қилиниши вә шуниңдәк дәл "иккийүзлимчи" кадирларға зәрбә бериш тәкитлиниватқан шараитта тутқун қилинған болуши гуман қозғиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт