Хитай һөкүмити мишел бачилет билән учрашқан “вәкил” ләрниң бәзилиригә хәт яздурған

Мухбиримиз җәвлан
2022.07.27
Share on WhatsApp
Share on WhatsApp

Б д т кишилик һоқуқ алий комиссари мишел бачилет уйғур районини зиярәт қилғанда, хитай һөкүмити аталмиш “вәкиллик кишиләр” ни униң билән учраштурғаниди; бүгүнки күндә улардин бәзилирини һәрикәткә кәлтүрүп, мишел бачилетқа елхәт яздурған.

7-Айниң 27-күни хитайчә “тәңритағ” торида берилгән хәвәрдә мундақ дейилгән: “йеқинқи мәзгилдин буян, шинҗаңдики көплигән кишиләр б д т кишилик һоқуқ алий комиссари мишел бачилетқа елхәт йоллап, өзлириниң кәчмишлирини баян қилди, шинҗаңниң һәқиқий әһвалини тонуштурди һәмдә америка башчилиқидики ғәрб күчлириниң шинҗаңға қара сүркәшлиригә болған күчлүк наразилиқини ипадилиди”.

Хәвәрдә ейтилишичә, хәт язғанлар ичидә “террорчиларниң зиянкәшликигә учриғанлар, кәспий тәрбийәләш мәркизидә оқуғанлар, диний затлар, илмий хадимлар, қол һүнәрвәнчиләр, завутта ишләйдиғанларниң вәкиллири” бар икән. Қәшқәр һейтгаһ җамәсиниң имами мәмәт җүмә дадиси җүмә дамоллиниң қандақ зиянкәшликигә учриғанлиқини баян қилған болса, кәспий тәрбийәләш мәркизидә оқуған зәйнур намәтқари өзиниң бу йәрдә җинсий хорлуққа учримиғанлиқини ейтқан. Шинҗаң ислам җәмийитиниң рәиси абдурәқип төмүр нияз мусулманларниң бу йәрдә әркин яшайдиғанлиқини баян қилған болса, шинҗаң университетиниң профессори, муавен мәктәп мудири зулһаят исмаил аз санлиқ милләтләр мәдәнийитиниң қоғдиливатқанлиқини ейтқан.

Б д т кишилик һоқуқ алий комиссари мишел бачилет 5-айниң ахирида уйғур районида кишилик һоқуқ әһвалини тәкшүримән дәп берип, ши җинпиңниң кишилик һоқуқ тәлиматини аңлап йенип кәлгәниди. У бу йил 8-айниң ахирида вәзиписидин истепа бериштин аввал, уйғур райони һәққидики кишилик һоқуқ доклатини елан қилидиғанлиқини билдүргән болсиму техичә елан қилмайватқан болуп, хитайниң буниңға бар күчи билән тосқунлуқ қиливатқанлиқи мәлум болғаниди. Хитай һөкүмитиниң бу аталмиш “вәкилләр” гә хәт яздурушиму, шу мәқсәтни көрситип бәргән.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.