Rusiyelikler bayqal köli süyini xitaygha sétishqa qarshi imza toplimaqta

Rusiyening bayqal köli rayonidiki ahaliler xitayning bayqal köli boyida su tazilash zawuti qurup, tazilan'ghan köl süyini botulkilargha qachilap, xitayda sétishqa qarshi imza toplash pa'aliyetlirini uyushturmaqta

Rusiyening “Sibiriye xewerler”toridiki bu heqtiki uchurdin melum bolushiche, hazirghiche 155ming rusiyelik xitayning bayqal köli boyida su tazilap qachilash zawuti qurushigha qarshi imza toplashqa qatniship öz imzalirini qoyghan.

Radi'omiz xitay bölümimu bu heqte rusiye menbeliri asasi uchur tarqatqan bolup, melum bolushiche, rusiyeliklerning mezkur imza toplash pa'aliyiti bayqal köli boyida zawut qurushqa qarshi turush, yene bayqal kölining süyini xitaygha sétishqa qarshi turushtin ibaret ikki xil imza toplash bolup, her bir imza guruppisigha 70 mingdin adem qol qoyghan.

Melum bolushiche, hazir bayqal köli su yüzining töwenlishi we süyining azlishi éghirlashmaqta iken.

Nöwette, bayqal köli boyidiki ahaliler bayqal süyi we uning muhitining bulghinishidin endishe qilishmaqta. Intérfakis agéntliqining xewer qilishiche, 2016-yili, xitay bayqal kölide sayahetchilikni yolgha qoyush we bashqa sahelerge 11 milyard dollar meblegh salidighanliqini böldürgen idi.

Rusiyening “Rosbalt” torining 27-apirildiki xewiride déyilishiche, bayqal köli boyidiki irkutsk shehiridiki amma rusiye prézidénti we hökümiti, oblast bashliqi we bashqa munasiwetlik rehberlerge bayqal kölini qoghdashni telep qilip muraji'etname ewetken.