Уйғур балилириниң йоқап кетиши хәлқараниң диққитини қозғимақта

Мухбиримиз сада
2018-09-21
Share

Бирләшмә агентлиқниң бүгүн, йәни 21-сентәбир елан қилған мақалисидә уйғур дияридики бир милйондин артуқ кишиниң аталмиш «қайта тәрбийә» намидики лагерлириға қамилиши билән уларниң пәрзәнтлириниң һөкүмәт башқурушидики дарилетамларға елип кетилгәнлики илгири сүрүлгән.

Мақалидә дейилишичә, бу хил дарилетамлар бейҗиң даирилириниң балиларни өзиниң аилиси вә мәдәнийитидин айриветиштики әң йеңи системилиқ урунушлириниң бири икән. Мақалида йәнә лагер сиртидики ата-аниларниң өз пәрзәнтлириниң миллий кимликиниң йоқилип кетишидин әндишә қиливатқанлиқи баян қилинған.

Мақалидә йәнә бирләшмә агентлиқиниң түркийәдә турушлуқ мухбирлириниң қурбан һейт мәзгилидә истанбулдики уйғурларниң өйлиридә зиярәттә болғанлиқи баян қилинған. Гәрчә бу бир хушал болушқа тегишлик вақитлар болсиму, хитайдин қечип чиққан, әмма пәрзәнтлири хитайда қәп қалған кишиләрниң еғир қайғу ичидә туруватқанлиқи тәсирлик мисаллар арқилиқ йорутуп берилгән.

Мақалидә аяли вә пәрзәнти хитай тәрипидин зиянкәшликкә учриған халмурат идрисниң кәчүрмиши тилға елинған. У мундақ дегән: «аялимниң аписи еғир кесәл болғанлиқтин, у аписиниң һалидин хәвәр елиш үчүн йеңи туғулған оғлимизни елип түркийәдин вәтәнгә қайтқан иди. Мән аялимға нәччә қетим хитайға бармаслиқини ейтқан болсамму, у "биз қанунға хилап һечқандақ иш қилмидуқ, бизгә һечқандақ хәтәр йәтмәйду" дәп қайтип кәткән иди. Бир мәзгилдин кейин аялимниң үрүмчи айродромида тутулғанлиқи вә бир қанчә күндин кейин қоюп берилгәнликини билдим. Шуниңдин кейин аялим маңа өзиниң алдирашлиқини, һазирчә түркийәгә қайтип баралмайдиғанлиқини ейтти һәм бир айдин кейин аялим вә баламниң тәңла түрмигә ташланғанлиқидин хәвәр таптим. »

Көзәткүчиләрниң билдүрүшичә, хитай һөкүмити өткән мәзгилләрдә бигунаһ уйғурларни лагерларға солап, уларға «меңә ююш» һәрикити елип барған болса, әмдиликтә кичик балиларни ата-анисидин айрип, уйғурларниң миллий кимлики вә мәдәнийитини йилтизидин қурутуветиш усулини қолланмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.