“вашингтон почтиси” гезити: “байден билән шиниң учришиши америка-хитай мунасивәтлириниң техиму начарлишидиғанлиқини көрсәтти”

Мухбиримиз әркин
2022.11.17

“вашингтон почтиси” гезитиниң обзорчиси җош роген 16-ноябир мақалә елан қилип, 14-ноябир билән һиндонезийәниң бали шәһиридә көрүшкән америка президенти байден билән хитай рәһбири ши җинпиңниң учришиши, америка-хитай мунасивәтлириниң яхшиланмайдиғанлиқи, бәлки техиму начарлишидиғанлиқини намайән қилғанлиқини билдүргән. Җош рогенниң ейтишичә, уларниң учришиши, әмәлийәттә икки дәриҗидин ташқири чоң дөләтниң кәлгүси бир нәччә ай вә бир нәччә йилда техиму көп қаршилишишқа қарап йүзлинишидәк әпсуслинарлиқ реаллиқни көрситип бәргән.

Җош роген “байден билән шиниң учришиши америка-хитай мунасивәтлириниң яхшиланмайдиғанлиқи, техиму начарлишидиғанлиқини көрсәтти” мавзулиқ мақалисидә, үч саәт давамлашқан сөһбәттә маһийәтлик илгирләш болмиғанлиқи, чүнки америка-хитай мунасивәтлириниң қурулма характерлик икәнлики, гәрчә ши җинпиң кәйпиятни яхшилашни ейтқан болсиму, бирақ униң һәрикити башқа бир реаллиқни сөзләватқанлиқини билдүргән.

 Җош рогенниң ейтишичә, байден һөкүмитиниң америка-хитай мунасивәтлирини “сағлам вә муқим йолға селиш” чүшәнчисидики мәсилә, бейҗиңниң начарлишиватқан характери, шундақла ши җинпиңниң һәрқандақ ихтилаплиқ мәсилини музакирә қилишни халимайдиғанлиқини көрмәскә селишида ипадиләнмәктә икән.

У, ши җинпиң өмүрлүк диктатур болған вә һоқуқини мустәһкәмлигәндин кейин, хитайниң тәйвәнгә һәрбий иғвагәрчилик қилиши, уйғурларға қаритилған кәң көләмлик қәбиһлик, адаләтсиз сода вә башқа һәрқандақ бир мәсилидә маһийәтлик бир иш қилишқа қизиқмайдиғанлиқини билдүргән. Җош рогенниң ейтишичә, вашингтон ши җинпиңниң гуманлиқ тәшәббуслириға қулақ селишниң орниға, асиядики иттипақдашлириға вә шериклиригә вә америка һәрбир қоманданлириға техиму көп қулақ селиши керәк икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.