Байден һөкүмитиниң хитайдин келиватқан адәмсиз учқуларға баҗни техиму көпәйтиши тәләп қилинған

Вашингтондин мухбиримиз әзиз тәйярлиди
2024.03.26

Ройтерс агентлиқиниң хәвиригә қариғанда, йеқинда америка җумһурийәтчиләр вә демократчилар партийәсидин болған бир қисим сиясийонлар байден һөкүмитигә коллектип тәклип йоллап, хитайдин келиватқан адәмсиз учқуларға техиму юқири таможна беҗи қоюшни тәләп қилған.

 “америка-хитай истратегийәлик риқабәт пәвқуладдә комитети” ниң рәиси майк галлагер (Mike Gallagher) башчилиқидики 11 киши бу коллектип тәклипкә имза қойған. Мәктупта “хитайдин импорт қилиниватқан адәмсиз учқуларниң төкмә болуши америка үчүн, өз нөвитидә миллий вә иқтисадий бихәтәрлик тәдбирлири үчүн тәһдит пәйда қилиду” дейилгән, шуниңдәк DJI, Autel қатарлиқ маркилар алаһидә тилға елинған.

Мәлум болушичә, һазирқи бәлгилимидә импорт қилинған адәмсиз учқуға 25 пирсәнт баҗ қоюлидикән. Тәклиптә бу баҗ миқдариниң йетәрлик әмәслики алаһидә тәкитләнгән. Әмма һәр икки ширкәт буниңға қарши туридиғанлиқини билдүрүп, өзлири ясиған адәмсиз учқуларниң америка тәвәсидики сода паалийәтлиригә нурғун қолайлиқларни елип келиватқанлиқини тәкитлигән.

Хәвәрдә ейтилишичә, хитай ишләпчиқарған адәмсиз учқу америка базиридики сода ишлириға ишлитилидиған адәмсиз учқуниң 90 пирсәнттин көпрәкини тәшкил қилидикән. Әмма йеқиндин буян хитайниң малайсия арқилиқ америка базириға адәмсиз учқу екиспорт қиливатқанлиқи мәлум болушқа башлиған. Нөвәттә хитайдин импорт қилиниватқан адәмсиз учқуниң өз нөвитидә америка асминида учуш җәрянида топлиған учурларни хитай тәрәпкә йоллаш еһтималиниң барлиқи әң зор әндишиләргә сәвәб болмақта икән.

Америка дөләт мәҗлиси 2019-йили бәш бурҗәклик бина (дөләт мудапиә министирлиқи) ниң хитайда ишләнгән һәрқандақ адәмсиз учқуни сетивелиши яки ишлитишини мәни қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.