Baydén hökümitining xitaydin kéliwatqan ademsiz uchqulargha bajni téximu köpeytishi telep qilin'ghan

Roytérs agéntliqining xewirige qarighanda, yéqinda amérika jumhuriyetchiler we démokratchilar partiyesidin bolghan bir qisim siyasiyonlar baydén hökümitige kolléktip teklip yollap, xitaydin kéliwatqan ademsiz uchqulargha téximu yuqiri tamozhna béji qoyushni telep qilghan.

 “Amérika-xitay istratégiyelik riqabet pewqul'adde komitéti” ning re'isi mayk gallagér (Mike Gallagher) bashchiliqidiki 11 kishi bu kolléktip teklipke imza qoyghan. Mektupta “Xitaydin import qiliniwatqan ademsiz uchqularning tökme bolushi amérika üchün, öz nöwitide milliy we iqtisadiy bixeterlik tedbirliri üchün tehdit peyda qilidu” déyilgen, shuningdek DJI, Autel qatarliq markilar alahide tilgha élin'ghan.

Melum bolushiche, hazirqi belgilimide import qilin'ghan ademsiz uchqugha 25 pirsent baj qoyulidiken. Teklipte bu baj miqdarining yéterlik emesliki alahide tekitlen'gen. Emma her ikki shirket buninggha qarshi turidighanliqini bildürüp, özliri yasighan ademsiz uchqularning amérika tewesidiki soda pa'aliyetlirige nurghun qolayliqlarni élip kéliwatqanliqini tekitligen.

Xewerde éytilishiche, xitay ishlepchiqarghan ademsiz uchqu amérika baziridiki soda ishlirigha ishlitilidighan ademsiz uchquning 90 pirsenttin köprekini teshkil qilidiken. Emma yéqindin buyan xitayning malaysiya arqiliq amérika bazirigha ademsiz uchqu ékisport qiliwatqanliqi melum bolushqa bashlighan. Nöwette xitaydin import qiliniwatqan ademsiz uchquning öz nöwitide amérika asminida uchush jeryanida toplighan uchurlarni xitay terepke yollash éhtimalining barliqi eng zor endishilerge seweb bolmaqta iken.

Amérika dölet mejlisi 2019-yili besh burjeklik bina (dölet mudapi'e ministirliqi) ning xitayda ishlen'gen herqandaq ademsiz uchquni sétiwélishi yaki ishlitishini men'i qilghan idi.