BBC Хитайда йүз бәргән лагердики җинсий хорлаштәк вәқәләрни" тоғра, адил" хәвәр қилип кәлгәнликини билдүрди

Мухбиримиз әркин
2021-02-05
Share

Әнглийәниң дунядики нопузлуқ ахбарат оргини – BBC өзиниң хитайда йүз бәргән корона вируси юқуми, лагердики уйғурларниң системилиқ җинсий хорлашқа учришидәк вәқәләрни "тоғра вә адил" хәвәр қилип кәлгәнликини билдүрүп, хитай ташқи ишлар министирлиқиниң бу җәһәттики тәнқидлирини рәт қилған.
BBC Агентлиқи 3-феврал күни лагердики уйғур аяллириниң системилиқ қийин-қистақ вә җинсий хорлашқа учраватқанлиқи тоғрисида бир доклат елан қилған. BBC Ниң доклати дуняда қаттиқ зил-зилзилә қозғап, хитайни қаттиқ биарам қилғаниди.

Хитай һөкүмити дунядики мәзкур нопузлуқ ахбарат оргининиң бәргән хәвәрлирини "ялған, идеологийилик бир тәрәплимилик хәвәрләр" дәп әйиблигән.
BBC Агентлиқи 3-феврал елан қилған доклатида хитайниң уйғур елидики җаза лагерлирида йетип чиққан уйғур аял шаһитлириниң гуваһлиқиға йәр бәргән. Ройтерс агентлиқиниң хәвәр қилишичә, BBC агентлиқи, 4-феврал баянат елан қилип, "биз хитайда йүз бәргән вәқәләр тоғрисида бәргән хәвәрлиримизниң тоғра вә адил икәнликидә қәтий чиң туримиз. ялған хәвәр вә идеологийилик бир тәрәплимилик дегәндәк асассиз әйибләшләрни рәт қилимиз" дегән.

Хитай ташқи ишлар министирлиқи 4-феврал күнидики ахбарат йиғинида, BBC ниң доклатини һечқандақ пакит асаси йоқ, дәп әйибләп лагерда йетип чиққан уйғур аял шаһитлириға һуҗум қилған. Хитайниң "йәршари вақти" гезити 5-феврал тәһрират мақалиси елан қилип, BBC ни "журналстлиқ әхлақиға еғир хилаплиқ қилди" дәп әйиблигән. Бирақ ройтерс агентлиқиниң хәвиридә ейтилишичә, BBC баянатида өзлириниң давамлиқ "қорқмай вә һечкимгә майил болмай" хәвәр беридиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт