Kishilik hoquqni közitish teshkilati b d t bash katipi gutérrésni sözide Uyghurlarni tilgha élishqa chaqirdi

Muxbirimiz erkin
2020-02-24
Share

Xelq'ara kechürüm teshkilati 24‏-féwral küni b d t bash katipi antoni'o gutérrésning b d t kishilik hoquq kéngishide sözligen sözige inkas qayturup, uning Uyghur, rohingga we süriyediki toqunush qatarliq mesililerde éniq we konkrét bolushini telep qildi. Antoni'o gutérés 24‏-féwral jenwede ötküzülgen b d t kishilik hoquq kéngishining 43‏-nöwetlik yighinining échilish murasimida söz qilip, dunyadiki toqunush, hawa kilimati we kishilik hoquq depsendichiliklirini hel qilishning 7 nuqtiliq heriket pilanini otturigha qoyghan. U, döletler, shirketler we xelqlerni yershari miqyasida kishilik hoquqni eslige keltürüsh we berpa qilish üchün heriketke ötüshke ündigen. Gutérrés: "Men kishilik hoquq kéngishige xelq'ara di'alog we hemkarliqni ilgiri sürüp, kishilik hoquqqa türtke bolush herikiti qozghashni chaqirishqa keldim" dégen. Lékin u kishilik hoquqqa xilapliq qiliwatqan héchqandaq bir döletni tilgha almighanidi. +

Birleshme agéntliqining xewer qilishiche, kishilik hoquq közitish teshkilatining ijra'iye diréktori kénnis rot gutérrésning sözige derhal inkas qayturup mundaq dégen: "Bash katip kishilik hoquq qurbanlirining küchlük awazi we kishilik hoquq depsendichilirining tenqidchisi bolup, meyli xitaydiki Uyghurlarning keng kölemlik tutqun qilinishida bolsun, meyli birmining rohinggalargha qarita sadir qilghan wehshiylikide bolsun yaki rusiye we süriyening idlibtiki puqralarni qalaymiqan bombardiman qilishida bolsun kishilik hoquqni éghir depsende qiliwatqan hökümetlerge qarshi turupmu put tirep turalaydu." 

Gutérrés ilgiri xitayda 3 milyondek Uyghur qatarliq musulmanlarning tutqun qilinip, lagérlargha qamilishigha süküt qilish bilen eyiblinip kelgenidi. Kénnis rotning birleshme agéntliqigha bildürüshiche, "Uning pilani b d t bash katipi saghlam we qerellik ashkara pikir élan qilip, kishilik hoquq depsendichilirining ismini tilgha élishtin qachmighandila muweppeqiyet qazinalaydiken."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet