“Wol-strét zhurnili” géziti: “B d t inawitini saqlap qalimen dése, bachélétni wezipisidin élip tashlishi kérek”

Amérikaning “Wol-strét zhurnili” gézitide 12-iyun élan qilin'ghan bir obzorda, eger b d t özining inawitini saqlap qalimen dise, b d t kishilik hoquq aliy komissarining wezipisidin ayrilishi kéreklikini bildürgen. Mezkur gézitning obzorchisi mariy anastasiya ogradiy qelemge alghan mezkur obzorda éytilishiche, emeliyette kishilik hoquq aliy komissari mishél bachélét kishilik hoquqqa anche köngül bölmeydiken.

Obzorda uning ötken aydiki xitay ziyaritide xitayning teshwiqatini qilghanliqi, buning heyran qalarliq emeslikini, chünki burun kuba üchün urush qilghan bachélétning soghuq urush dewride sabiq sowét ittipaqi terepte turghanliqi we kuba inqilabining mestanisi ikenliki, kishilik hoquq uning ishi emeslikini bildürgen.

Mariy anastasiya ‍ogradiyning “B d t ning diktatorlar kechürümchisi” mawzuluq obzori ötken hepte dunyadiki 200 din artuq ‍ammiwiy teshkilat bachélétning istépa bérishini telep qilishining arqisidin, shundaqla bachilét 13-iyun küni özining yene bir nöwetlik b d t kishilik hoquq aliy komisarliqini talashmaydighanliqini jakarlishidin bir kün burun élan qilin'ghan.

Birleshme agéntliqining xewer qilishiche, wezipe ötesh mudditi bu yil 31-awghustta toshudighan bachélét, 13-iyun küni b d t kishilik hoquq kéngishining yaz pesillik yighinining échilishida özining yuqiriqi qararini élan qilghan.

Tenqidchiler, xitay ziyariti mezgilide bachélétning Uyghurlar heqqide yéterlik sözlimigenliki, xitay da'irilirige yéterlik bésim qilmighanliqi, uning bu sepiride peqet xitayning yuqiri derijilik da'iriliri bilen alaqe qanili achqanliqini bildürgen idi. Birleshme agéntliqining éytishiche, bachélét düshenbe küni özining xitay ziyaritige a'it yéngi tepsilatlarni teminlep, shinjangdiki Uyghur we bashqa musulman az sanliq milletlerge qaritilghan xalighanche tutup turush we “Xorlash endizisi” ge bolghan endishilirini otturigha qoyghanliqini éytqan. Biraq mariy anastasiya ogradiyning tekitlishiche, bachélétning “Meyli kubada yaki xitayda bolsun, zalimlargha hésdashliq qilidu, dégen tesiridin qéchish qiyin bolup, b d t özining inawétini saqlap qalmaqchi bolsa, uning wezipisidin ayrilishi kérek,” iken.