Хитай һөкүмити өзигә бағлиқ аталмиш “тәшкилатлар” намида б д т ниң уйғурлар һәққидики доклатини әйиблигән

Мухбиримиз ирадә
2022.07.28
Share on WhatsApp
Share on WhatsApp

Хитайниң һөкүмәт ахбарати болған “хитай хәвәрләр тори” йеқинда дуняниң һәрқайси җайлиридики 900 дин ошуқ аммиви тәшкилат имза қойған бир парчә очуқ хәтни елан қилип, бу тәшкилатларниң бирдәк мишел бачелетни уйғурлар һәққидики доклатни елан қилмаслиққа чақирғанлиқини билдүргән.

“хитай хәвәрләр тори” ниң илгири сүрүшичә, һәрқайси әлләрдики җәмий 923 аммиви тәшкилат бирликтә бирләшкән дөләтләр тәшкилати кишилик һоқуқ алий комисссарлиқи тәрипидин тәйярланған, әмма хитайниң бесими билән икки йилға йеқин вақиттин бери елан қилинмайватқан бу доклатни “сахта вә хитайға қарши күчләрниң ялған гуваһлиқлири билән толған” дәп әйиблигән, шундақла мишел бачелет ишханисини бу доклатни елан қилишни рәт қилишқа чақирған.

Һалбуки, фирансийә хәлқара радийоси (RFI) ниң юқириқи бу аталмиш аммиви тәшкилатларни тәкшүрүп көрүшичә, бу 923 тәшкилатниң көпи хитайниң өзидики тәшкилатлар икән. Уларниң ичидики 700 дин көпрәки уйғур елидики аталмиш “аммиви тәшкилатлар” дәп көрситилгән болса, қалған чәт әл тәшкилатлириниң көпинчиси африқа дөләтлири һәмдә пакистан қатарлиқ хитай билән интайин қоюқ мунасивити бар дөләтләрдики “тәшкилат” лар икән.

Бу аталмиш “аммиви тәшкилат” лар ичидики 138-орунға тизилғини “франсийәдики һөкүмәттин мустәқил бир аммиви тәшкилат” дейилгән болуп, униң исми “франсийә поленизийә вә тинч окян ишлири кеңиши” (法屬波利尼西亞太平洋事務理) икән.

Фирансийә хәлқара радийосиниң игилишичә, ингилизчә нами “тинч окян ишлири кеңиши” болған бу тәшкилат әслидә “хитайниң чәт әлләр билән достлуқ җәмийити” дәп аталған тәшкилатниң һәмкарлиқида қурулған тәшкилат болуп, у хитай компартийәсиниң чәт әлләргә созулған қоли болған “хитай мәркизи бирликсәп бөлүми” тәрипидин қурулған икән. “тинч окян ишлири кеңиши” ниң башлиқи хирия оттино (Hiria Ottino) ниң хитай һөкүмити билән болған мунасивити интайин қоюқ болуп, у давамлиқ һалда хитайниң йипәк йолиға мунасивәтлик йиғинлириға қатнишип кәлгән икән.

Хитай һөкүмитиниң нөвәттә дуняниң һәрқайси җайлиридики кишилик һоқуқ органлири, уйғур тәшкилатлири бирликтә мишел бачелетни уйғурлар һәққидики бастуруп қоюлған доклатни елан қилишқа қиставатқан бир пәйттә, аталмиш “чәт әл тәшкилатлири” намида бу доклатни елан қилмаслиқни тәшәббус қилиши, диққәт қозғимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.