Хитай б д т ниң уйғурлар һәққидики доклатини хитай ичидә қаттиқ чәклимәктә

Мухбиримиз ирадә
2022.09.08
Share on WhatsApp
Share on WhatsApp

Американиң хитайда турушлуқ баш әлчиси николас бурнис (Nicholas Burns) бирләшкән дөләтләр тәшкилати кишилик һоқуқ алий комиссарлиқи елан қилған уйғурлар һәққидики доклатниң хитай иҗтимаий таратқулирида чәклиниватқанлиқини билдүргән.

Баш әлчи николас бурнис 7-сентәбир күни өзиниң рәсмий тивиттер һесабида елан қилған учурида мундақ дегән: “хитай компартийәси йәнә бир қетим биз үндидар вә вейбо һесаблиримиз арқилиқ тарқатқан б д т ниң уйғурлар һәққидики доклатиға аит йолланмимизни өчүрүвәтти. Бу доклатта уйғурлар вә башқа аз санлиқ милләтләргә қилиниватқан адәмни чөчүткүдәк муамилә пакитлар билән қәйт қилинған.”

Мәлум болушичә, хитай тәрәп американиң бейҗиңдики әлчиханисиниң вейбо вә үндидардики һесаблири, шундақла америка ташқий ишлар министири антоний билинкинниң “бу доклат хитай һөкүмәт органлириниң уйғурларға вә шинҗаңдики башқа аз санлиқ милләтләр вә динға етиқад қилғучи аммиға қарши елип бериливатқан ирқий қирғинчилиқ вә инсанийәткә қарши җинайәтлири һәққидики әндишилиримизни чоңқурлаштурди вә уни испатлап бәрди” дегән инкасини өчүрүвәткән. Баш әлчи николас тивиттердики учурида, хитай даирилириниң бу һәрикитини “пикир әркинликигә қилинған һуҗум” дәп атиған.

Адәттә уйғурларға йүргүзүлүватқан вәһшийликләргә даир һәрқандақ доклат вә хәвәргә бәс-бәстә қарши туруп, тәтүр тәшвиқат һәрикитигә өтидиған хитай ахбаратлириниң бу нөвәт сүкүттә турувелиши, һәр саһәниң диққитини қозғимақта.

Америкада чиқидиған “хәвәр һәптилики” (Newsweek) ниң хәвиридә көрситилишичә, хитай ахбаратлиридики сүкүтниң асаслиқ сәвәби доклатниң хитай компартийәсиниң икки қурултийи ечилиш алдидики сәзгүр мәзгилгә тоғра кәлгән болуши билән мунасивәтлик икән.

“вол-ситрит журнили” гезити йеқинда елан қилған бир хәвиридә, “б д т доклатиниң хитай һөкүмитиниң уйғурлар һәққидики әйибләшләрни ‛хитайға қарши күчләр ойдуруп чиқарған рәзил ялғанчилиқ‚ дәп атишини қийинлаштуруветидиғанлиқини” ни билдүргән. Шундақла бу доклат әгәр хитай ичидә тарқалса, хитай хәлқи арисидиму бәлгилик тәсир пәйда қилиши мумкинликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.