B d t teripidin musapirliq salahiyiti bérilgen bir Uyghur misir bixeterlik da'iriliri teripidin tutup kétilgen

B d t ning musapirlar mehkimisi teripidin musapirliq salahiyiti bérilgen bir Uyghur musapiri yéqinda misir bixeterlik da'iriliri teripidin tutup kétilgen. Melum bolushiche, bu yil 38 yashliq bilal abdukérim isimlik bu Uyghur musapirining türkiyede waqitliq turush guwahnamisi bar bolup, ayali we 4 perzenti bar iken. Chet'el ‍ijtima'iy alaqe supilirida tarqalghan xewerler we biz érishken deslepki uchurlardin melum bolushiche, bilal abdukérimning 3-ayning 21-küni etigende öyidin chiqip ketkenche iz-dériki bolmighan.

Bu heqtiki uchurlarda, bilal abdukérim ghayib bolghan shu küni kechte misir saqchilirining uning öyige kélip a'ilisidin uning pasportini sorighanliqi, lékin ayalining saqchilargha b d t ning musapirliq guwahnamisini körsetkenliki ilgiri sürülgen.

Melum bolushiche, bilal abdukérim misir bixeterlik o‍rganlirining 2017-yili xitay da'iriliri bilen birliship, misirdiki Uyghurlarni keng kölemlik tutqun qilish herikitidin aman qalghan, shu qétimqi tutqunda bir türküm Uyghurlar xitaygha qayturup bérilgen bolsimu, lékin yene xéli bir türküm Uyghurlar türkiyege qéchip kélishke muweppeq bolghanidi. Misir da'irilirining eyni waqittiki bu herikiti xelq'ara kishilik hoquq teshkilatlirining qattiq tenqidige uchrighan.

Amérika tashqi ishlar ministirliqi qayta-qayta bayanat élan qilip, bashqa döletlerning Uyghur musapirlirini xitaygha qayturup bérishini toxtitishini telep qilghanidi. Chet'el ijtima'iy alaqe supiliridiki uchurlardin melum bolushiche, qahirede turushluq bezi Uyghurlar misir amanliq ‍organliridin bilal abdukérimning aqiwitini sürüshtürüp, 23-mart küni uning misir dölet bixeterlik idarisi teripidin tutqun qilin'ghanliq xewirige érishken. Nöwette, misir bixeterlik da'irlirining uni néme sewebdin tutqun qilghanliqi melum emes. Melum bolushiche, u, b d t musapirlar mehkimisi teripidin bérilgen guwahnamisining waqti 23-mart küni toshushqa ikki kün qalghanda tutup kétilgen.