B d t bash katipi: "Uyghur élida cheklimisiz tekshürüsh élip bérish üchün xitay bilen sözlishiwatimiz"

Muxbirimiz erkin
2021-03-29
Share

B d t ning bash katipi antoni gutérrés, xitay hökümiti bilen Uyghur élida cheklimisiz tekshürüsh élip bérish toghriliq "Jiddiy sözlishiwatqanliqi" ni bildürgen. Bu xitayning Uyghur élidiki "Irqiy qirghinchiliqi" gha süküt qilish bilen eyiblinip kelgen b d t bash katipining tunji qétim Uyghurlar weziyiti heqqide bundaq bir ipadide bolushidur.

Gutérrésning éytishiche, b d t kishilik hoquq aliy komissari mishél bachilétning ziyariti heqqide "Hazir kishilik hoquq aliy komissariyati ishxanisi bilen xitay da'iriliri otturisida söhbet élip bérilmaqta" iken.

Gutérrés: "Men ularning tézraq kélishim hasil qilishini we kishilik hoquq aliy komissarining tosalghusiz we cheklimisiz xitayda ziyarette bolushini ümid qilimen," dégen. Gutérrés bu sözlerni 28-mart kanada axbarat shirkiti CBC ning muxbiri rozimari bartonning ziyaritini qobul qighanda éytqan. Mishél bachilét ötken ayda "Shinjangdiki xalighanche tutqun, qopal mu'amile, jinsiy zorawanliq, mejburiy emgek toghrisidiki doklatlarni etrapliq we musteqil tekshürüp bahalashning zörürliki" ni bildürgen. Biraq xitay hökümiti uning rayonda tekshürüsh élip bérishigha izchil aldinqi shert qoshup kelgen idi

Xitay tashqiy ishlar ministirliqining bayanatchisi jaw lijyen 29-marttiki axbarat yighinida bachilétning "Shinjangni ziyaret qilishini qarshi alidighanliqi", emma "Ziyaretning öz ara alaqe we hemkarliqni meqsed qilishi, atalmish jinayet izdesh sheklide bolmasliqi" ni tekitligen. Chet ellerdiki xitay öktichi taratqulirining éytishiche, nöwette xitay hökümiti özining Uyghur élida sadir qilghan jinayetlirini qandaq yoshurushning koyigha chüshken. Bu heqtiki xewerlerde xitay kompartiyesi siyasiy byurosining da'imiy ezasi wang yang we xitay j x ministiri jaw kéjining ötken hepte shinjanggha qilghan ziyaritining buning bilen munasiwetliki ikenliki ilgiri sürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet