Б д т кишилик һоқуқ алий комиссари "шинҗаңда тәкшүрүш елип баралмиғанлиқидин әпсусланғанлиқи" ни билдүргән

Мухбиримиз әркин
2021-09-13
Share

Б д т ниң кишилик һоқуқ алий комиссиари мишел бачилет 13‏-сентәбир өзиниң уйғур елида тәкшүрүш елип берип, мәзкур районда уйғур мусулманлириға қарита еғир кишилик һоқуқ дәпсәндичилики садир болуватқанлиқиға даир хәвәрләрни ениқлашқа мувәппәқ болалмиғанлиқидин әпсусланғанлиқини билдүргән.

Мишел бачелетниң ейтишичә, у уйғур елини зиярәт қилишқа мувәппәқ болалмиған болсиму, бирақ мәзкур районниң вәзийитигә даир доклатини ахирлаштуруш басқучиға келип қалған икән.

Хитай һөкүмити уйғур елиниң ташқий дуняға очуқ икәнликини тәкитлисиму, бирақ б д т кишилик һоқуқ алий комиссариниң районда тәкшүрүш елип бериш тәләплиригә изчил алдинқи шәрт қоюп, һәрқандақ тәкшүрүшниң "достанә зиярәт" болушини, "җинайи пакит топлаш" мәқситидә болмаслиқини тәләп қилип кәлгән.

Кишилик һоқуқ тәшкилатлири хитайниң бу арқилиқ аз дигәндә бир милйон 800 миң уйғурни лагер вә түрмиләргә қамаш, йүз миңлиған уйғур балилирини аилисидин айрип, йитимханиларға орунлаштуруш, туғутни чәкләп, уйғур нупусини азайтиш, уларни юрт-маканлиридин йөткәш, қул әмгикигә селиштәк бир қатар "ирқий қирғинчилиқ" қилмишлирини йошурмақчи боливатқанлиқини илгири сүрүп кәлди.

Ройтерс агентлиқиниң хәвәр қилишичә, мишел бачилет юқириқи сөзни б д т кишилик һоқуқ кеңишиниң 13‏-сентәбир җәнвәдә өткүзүлгән ечилиш мурасимида қилған болуп, у: "мениң шинҗаң уйғур аптоном районида һәқиқий рәвиштә тәкшүрүш елип бериш тиришқанлиқим ишқа ашмиди, бу һәқтә доклат берәлмигәнликимдин әпсуслинимән," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт