70 Uyghur teshkilati her qaysi döletlerni xitayning b d t kishilik hoquq organlirigha kirishige qarshi turushqa chaqirdi

Muxbirimiz jewlan
2020-10-07
Share

7-Öktebir Uyghur kishilik hoquq qurulushining tor bétide 70 Uyghur teshkilatining her qaysi döletlerni xitayning b d t kishilik hoquq organlirigha kirishige qarshi turushqa chaqirghanliqi xewer qilin'ghan.

Uningda éytilishiche, dunya Uyghur qurultiyi, Uyghur kishilik hoquq qurulushi we dunyaning her qaysi jayliridiki 18 dölette pa'aliyet qiliwatqan 68 Uyghur teshkilati birliship, birleshken döletler teshkilatigha telep sunup: "Biz birleshken döletler teshkilatigha eza her qaysi döletlerni xitayning dawamliq kishilik hoquq kéngishige eza dölet bolushigha qarshi turushqa chaqirimiz, chünki xitay Uyghurlarning kishilik hoquqigha dawamliq we sistémiliq halda ziyankeshlik qiliwatidu" dégen.

Xewerde bildürülüshiche, 10-ayning 13-küni birleshken döletler teshkilati kishilik hoquq kéngishi saylam ötküzüp, 15 yéngi döletni ezaliqqa kirgüzidiken, ularning wezipe mudditi 2021-yildin bashlap üch yil bolidiken.

Dunya Uyghur qurultiyining re'isi dolqun eysa mundaq dégen: "Xitay eger b d t kishilik hoquq kéngishige eza bolup kirse b d t teshebbus qilidighan yadroluq qimmet qarishini buzghunchiliqqa uchritidu. Birer döletni kishilik hoquq kéngishige eza bolushqa tallighanda uning kishilik hoquq xatirisige qarash kérek. Xitay kishilik hoquq chüshenchisige buzghunchiliq qilipla qalmay, b d t ning tesiridin paydilinip, özidiki qorqunchluq ehwalgha qarshi bérilgen pikirlerni basturup keldi".

Uyghur kishilik hoquq qurulushining mes'uli ömer qanat ependimu bu heqte toxtilip: "Uyghurlargha irqiy qirghinchiliq yürgüzüwatqan xitaydek bir döletning dunyaning he qaysi jayliridiki kishilik hoquqni nazaret qilidighan bir organ'gha saylinishining arqisidiki ghelite mentiqini qet'iy chüshen'gili bolmaydu" dégen.

Közetküchilerning qarishiche, xitay yéqinqi yillarda b d t kishilik hoquq kéngishige héchqandaq töhpe qoshmighan, belki ilgiri bir obdan kétiwatqan kishilik hoquqni qoghdash sistémisigha keng kölemlik buzghunchiliq qilghan؛ b d t ning xelq'aradiki kishilik hoquqni qoghdash mes'uliyitini étibargha almay, döletning igilik hoquqini qoghdash we bashqa döletlerning ichki ishigha arilashmasliqni tekitligen. Uyghur teshkilatlirining b d t yighinlirigha qatnishishigha izchil tosqunluq qilip kelgen. Xitay yéqinda otturigha qoyghan qarar kishilik hoquq mesilisige qaritilghan yene bir qétimliq buzghunchiliq bolup, b d t kishilik hoquq méxanizmining ünümlük ijra qilinishigha tehdit shekillendürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet