B d t ning Uyghurlar heqqidiki meydani dunyani ümidsizlendürdi

Birleshken döletler teshkilati (b d t) qarmiqidiki kishilik hoquq kéngishining Uyghurlar heqqidiki doklatta otturigha qoyulghan mesililerni munazire qilishni awazgha qoyushta ikki awaz kemchilliki tüpeylidin ret qilish heqqide qarar élishi dunya miqyasida b d t ning Uyghurlarni tashliwétishi, dep qarilishqa bashlidi.

“Wal sitrét zhurnili” gézitining 9-öktebirdiki tehrirat maqaliside bu hal ene shu yosunda teswirlinidu. Bolupmu diktatora asasidiki döletlerdin kuba, wénézu'éla, sudan qatarliqlardin bashqa islam dunyasigha mensup hindonéziye, pakistan qatarliqlarningmu bu mesilide xitaygha yaman körünüp qélishni xalimasliqi, b d t kishilik hoquq kéngishining doklatidiki “Tutqunlarni ach qoyush, uyqusiz qoyush, ibadet qildurmasliq, jinsiy xorluq arqiliq nomusigha tégish qilmishliri mewjut” dégendek eng eqelliy kishilik heqlernimu bermeslikke qarita shunche köp döletlerning süküt qilishi qattiq qamchilinidu.

Aptorlar “Kishilik hoquq kéngishi” dep nam qoyuwalghan mushundaq bir organning Uyghur diyaridiki ashu qeder ashkara bolghan eqelliy kishilik hoquq mesilisige qarap chiqishqimu yarimighanliqini tenqidlep; “Bu hal mezkur teshkilatning mewjut bolushi yaki amérika qoshma shtatlirining uninggha eza bolushining héchqandaq hajiti qalmighanliqini körsitip béridu” deydu.