Б д т кишилик һоқуқ мутәхәссислири: хитай һөкүмити б д т доклат қилған кишилик һоқуқ мәсилисини һәл қилиши керәк

Мухбиримиз җәвлан
2022.09.07
Share on WhatsApp
Share on WhatsApp

Бирләшкән дөләтләр тәшкилати кишилик һоқуқ алаһидә ишханиси 9-айниң 7-күни ахбарат елан қилип, б д т кишилик һоқуқ мутәхәссислириниң уйғур районидики кишилик һоқуқ мәсилисигә җиддий қараш керәклики һәққидики ортақ баянатини җакарлиған.

Б д т ниң мустәқил кишилик һоқуқ мутәхәссислири бу баянатида хитай һөкүмитиниң б д т елан қилған бу доклаттики кишилик һоқуқ мәсилисини һәл қилиши, дуняниңму бу мәсилигә көз юммаслиқи керәкликини билдүргән. Улар мундақ дегән: “хәлқара җәмийәт уйғур аптоном районида йүз бериватқан системилиқ кишилик һоқуқ дәпсәндичиликигә сәл қаримаслиқи вә буниң аз санлиқ милләт пуқралириға көрситиватқан тәсиригә диққәт қилиши керәк”.

Мутәхәссисләр 8-айниң 31-күни елан қилинған бу доклатниң әтраплиқ вә принсиплиқ болғанлиқини, чүнки униңда б д т кишилик һоқуқ алаһидә программисида хизмәт қилған мәсул хадимлар вә хизмәт гурупписиниң тәкшүрүш доклати вә көз қарашлириниң асас қилинғанлиқини билдүргән. Улар йәнә мәзкур доклатта хитайниң “террорлуқ вә әсәбийликкә қарши туруш қанун-сиясити” ни сүйистемал қилиш усуллириға диққәт қилишни тәвсийә қилған.

Мутәхәссисләр йәнә б д т кишилик һоқуқ алий кеңишини хитайдики кишилик һоқуқ мәсилиси тоғрулуқ алаһидә йиғин ечишқа, йиғинда кишиләр көңүл бөлүватқан халиғанчә тутқун қилиш, мәҗбурий ғайиб қиливетиш, диний әркинлик вә сөз әркинликини чәкләш қатарлиқ мәсилиләрни муһакимә қилишқа чақирған. Мутәхәссисләрниң пикричә, б д т кишилик һоқуқ алий кеңиши бир мутәхәссисләр гурупписи қуруп, хитайдики кишилик һоқуқ әһвалини һәр йили дегүдәк назарәт қилип доклат берип турушни ойлишиши керәк. Б д т йәнә алаһидә әлчи тәйинләп, б д т ға әза дөләтләр, б д т органлири вә чоң карханиларға һәйдәкчилик қилиш арқилиқ хитайниң кишилик һоқуқ мәсулийитини ада қилишиға түрткә болушни ойлишип бақса болиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.